İnam Kərimov: “Ali Məhkəmə olaraq biz hər zaman dialoqa və üzərimizə düşənləri etməyə hazırıq”

  • By admin
  • 14 İyul 2023 10:57

“Ali Məhkəmə məhkəmə islahatlarının mərkəzində yer alır. Son islahatlar çərçivəsində Ali Məhkəmə tərəfindən digər orqanlarla birgə təhlillər apararaq qabaqcıl beynəlxalq təcrübə öyrənilib”.

Gununsesi.info xəbər verir ki, bunu Femida Dialoq Platformasında sahibkarlarla görüşdə Ali Məhkəmənin sədri İnam Kərimov deyib.

O bildirib ki, nəticədə vahid məhkəmə təcrübəsinin formalaşdırılması, məhkəmələrin və hakimlərin sosial təminatının gücləndirilməsi və digər məsələlərlə bağlı bir çox normativ aktlar qəbul edilib:

“İslahatlar bununla yekunlaşmır. Qarşıda hələ də görüləcək işlər var və bundan sonra da islahatlar davam etdiriləcək. Prezidentin dediyi kimi, məhkəmə islahatlarının başlanğıcı var, sonu yoxdur”.

Ali Məhkəmənin sədri bildirib ki, ölkəmizdə məhkəmə sistemində davamlı islahatlar aparılır, ancaq sahibkarları narahat edən, dövrümüzün tələblərinə uyğun olaraq gündəlik təcrübədə rastlaşdıqları çətinliklər hələ də mövcuddur:

“Buna görə də sizinlə dialoq aparırıq. Dialoq isə daimi olmalıdır. Ali Məhkəmə olaraq biz hər zaman dialoqa və üzərimizə düşənləri etməyə hazırıq. O məsələlər ki, dövlətə və məhkəmə hakimiyyətinə aiddir və fundamental əhəmiyyət daşıyır, məsələn, məhkəmə orqanlarının səmərəliliyin gücləndirilməsi, vahid məhkəmə təcrübəsinin formalaşdırılması və mübahisələrin alternativ həlli institutlarının yaradılması, bu istiqamətdə də dövlət öz üzərinə düşənləri edir və bundan sonra da edəcək. Bildiyiniz kimi, qanunvericiliyə edilən son dəyişikliklərlə Ali Məhkəmənin vahid məhkəmə təcrübəsini formalaşdırmaq vəzifəsi təsbit edilib. Vahid məhkəmə təcrübəsi ölkənin hüquq sistemi üçün, eləcə də sahibkarlar üçün böyük əhəmiyyətə malikdir. Belə ki, bu təcrübə hüquqi müəyyənliyi təmin etməklə mübahisələrin məhkəmədən kənar həllinə, eləcə də ədalət mühakiməsinin səmərəliliyinin və keyfiyyətinin artırılmasına töhfə verir”.

Gununsesi.info