İngiltərədə dəri xərçənginin ən ölümcül növü olan melanomaya qarşı dünyada ilk “fərdiləşdirilmiş” mRNA peyvəndinin sınaqları keçirilir.
Gununsesi.info BBC-yə istinadən xəbər verir ki, keçən avqustda baş dərisində cərrahi yolla çıxarılan melanoma böyüməsi olan 52 yaşlı Stiv Yanq peyvəndi sınaqdan keçirən ilk xəstələrdəndir.
Peyvənd immunitet sisteminə qalan xərçəng hüceyrələrini tanımağa və məhv etməyə kömək etmək üçün hazırlanıb. Bu yolla da xərçəngin geri qayıtmayacağına ümid edilir.
London Universitet Kolleci Xəstəxanalarında (UCLH) keçirilən sınaqda həkimlər bu peyvəndi pembrolizumab və ya Keytruda adlı dərmanla birlikdə verirlər ki, bu da immunitet sisteminin xərçəng hüceyrələrini öldürməsinə kömək edir.
“Moderna” və “Merck Sharp and Dohme” (MSD) tərəfindən istehsal edilən birləşmiş müalicə hələ klinik sınaqlardan kənar səhiyyə sistemində rutin istifadəyə verilməyib.
Digər ölkələr, o cümlədən Avstraliya daha çox sübut toplamaq və daha geniş şəkildə tətbiq oluna biləcəyini görmək üçün xəstələr üzərində sınaqlar keçirir.
Peyvənd fərdi şəkildə təklif olunur, yəni onun strukturu hər bir xəstəyə uyğun olaraq dəyişdirilir.
Xəstənin öz şişinin genetik quruluşuna uyğun olaraq yaradılır. O, bədənə yalnız bu xərçəng hüceyrələrində olan markerlərə və ya antigenlərə hücum edən zülallar və ya antikorlar istehsal etməyi tapşırır.
UCLH tədqiqatçısı Dr. Heather Shawun sözlərinə görə, peyvənd melanoma xəstələrini müalicə etmək potensialına malikdir. Eyni zamanda o, ağciyər, sidik kisəsi və böyrək şişləri kimi digər xərçənglər üçün də sınaqdan keçirildiyini bildirib.
“Bu, həqiqətən də uzun müddətdir gördüyümüz ən həyəcanverici şeylərdən biridir. Bu, mütləq xəstə üçün xüsusi hazırlanmışdır. Başqa xəstə üçün istifadə etmək mümkün deyil. Çünki təsirini göstərməyəcək. Xüsusi olaraq hazırlanmışdır”– deyə tədqiqatçı əlavə edib.
Beynəlxalq sınağın Böyük Britaniya mərhələsi London, Mançester, Edinburq və Lids daxil olmaqla səkkiz mərkəzdə ən azı 60-70 xəstəni işə götürməyi hədəfləyir.
Londonda müalicə olunan Yanq çox həyəcanlı olduğunu və ondakı xərçəngin məhvi üçün ən yaxşı şansı olduğunu deyib.
Şəbnəm
Gununsesi.info
