Netanyahu İsrailin Livandakı Hizbullaha qarşı şimal sərhədinə daha çox əsgər göndərməyə hazırlaşdığını bildirərkən, İranın dəstəklədiyi qruplardan minlərlə döyüşçü Hizbullah üçün döyüşməyə hazır olduğunu bildirib.
Gununsesi.info xarici mediya istinadən xəbər verir ki, Yaxın Şərqdə İranın dəstəklədiyi qruplardan minlərlə döyüşçü gərginliyin daha da artacağı təqdirdə İsrailə qarşı mümkün genişmiqyaslı müharibədə Livan Hizbullahına qoşulmağa hazırlaşır.
Bildirilir ki, Livanın İsraillə şimal sərhədində İsrail və HƏMAS arasında oktyabrın əvvəlində başlayan müharibədən bəri demək olar ki, hər gün atışma olub.
İsrailin baş naziri Benyamin Netanyahu bazar günü deyib ki, İsrail Livandakı Hizbullaha qarşı şimal sərhədinə daha çox əsgər göndərməyə hazırlaşır və bu, Qəzzada qarşıdurmaların dayandırıla biləcəyinə işarədir. Hizbullah ilə gərginliyin artması İranın dəstəklədiyi döyüşçülərin və potensial olaraq İranın özünün də iştirak etdiyi daha geniş regional müharibəyə gətirib çıxaracaq.
Amerika Birləşmiş Ştatları (ABŞ) daha əvvəl belə bir hücuma qarşı xəbərdarlıq etmişdi.
Həmçinin ABŞ-ın yüksək rütbəli hərbi rəsmisi bildirib ki, İsrailin Livana hər hansı hücumu daha geniş müharibəyə səbəb ola bilər.
İsrailin müdafiə naziri Yoav Qallantın bu həftə Vaşinqtona səfəri gözlənilir. Səfər zamanı ABŞ-ın müdafiə naziri Lloyd Ostin, dövlət katibi Antoni Blinken və digər yüksək rütbəli ABŞ rəsmiləri ilə görüş planlaşdırılır və Birləşmiş Ştatların münaqişənin gərginləşməsinin qarşısını almaq üçün diplomatik vasitələrdən istifadə edəcəyi gözlənilir.
Qeyd edək ki, Hizbullahın yüksək səviyyəli komandirlərindən Taleb Abdullahın Livanın cənub-şərqində İsrailin hücumu nəticəsində öldürülməsindən sonra İsraillə Hizbullah arasında qarşıdurmaların intensivliyi artıb.
Şəbnəm
Gununsesi.info
