İranın Lorestan əyalətinin Xürrəmabad şəhərində mənbəyi hələ müəyyən edilməyən güclü səslə müşayiət olunan güclü zəlzələnin olduğu bildirilir.
Gununsesi.info xəbər verir ki, İran dövlət televiziyasının məlumatına görə, Xürrəmabad şəhərində güclü silkələnmə ilə yanaşı, gur səs də eşidilib.
Bildirilib ki, Tehran Universitetinin Geofizika İnstitutu bölgədə heç bir zəlzələ qeydə almayıb.
Lorestan əyalətinin Böhran idarəetmə ofisinin baş direktoru Mehdi Pazuki bildirib ki, bölgədə heç bir zəlzələ və ya partlayış qeydə alınmayıb, yeraltı təkan və səsin mənbəyi hələ müəyyən edilməyib.
İran rəsmisi partlayış ehtimalının uzaq olmadığını, məsələ ilə bağlı araşdırmaların davam etdiyini və ictimaiyyətə məlumat verəcəklərini bildirib.
Yarı rəsmi “Tesnim” xəbər agentliyi şəhərdəki bəzi vətəndaşların şiddətli sarsıntı və səs-küy səbəbiylə küçələrə çıxdığını açıqlayıb.
Ölkənin mərkəzi hissəsində yerləşən Xürrəmabad şəhərində İnqilab Keşikçiləri Ordusuna (SEPAH) məxsus raket bazası yerləşir.
Səid Əhmədli
Gununsesi.info
