İranın Pakistan ərazisinə hücumuna “masa üzərində bütün variantlar”la cavab verən İslamabad İrandakı Bəluc silahlılarını hədəf alan hücumlar həyata keçirib.
Gununsesi.info xəbər verir ki, Pakistan Xarici İşlər Nazirliyi kəşfiyyata əsaslanan əməliyyat çərçivəsində İrana qarşı yüksək koordinasiyalı hücumların həyata keçirildiyini və “çoxlu terrorçunun öldürüldüyünü” açıqlayıb.
“Pakistan İran İslam Respublikasının suverenliyi və ərazi bütövlüyünə tam hörmət edir. Bugünkü aksiyanın yeganə məqsədi Pakistanın yeni təhlükəsizliyini və milli maraqlarını qorumaqdır. Bunlar çox mühüm və güzəştə getməyən məsələlərdir”, – deyə açıqlamada bildirilir.
Hücumların silahlı qüvvələrə aid təyyarələr tərəfindən həyata keçirildiyini deyən Pakistan kəşfiyyat mənbələri bildirib ki, müstəqillik uğrunda mübarizə aparan Bəlucistan Azadlıq Cəbhəsi (BLF) adlı silahlı təşkilata istinad edərək, “Hədəfdə olan silahlılar BLF hərəkatının üzvləridir”.
İran mediası bir neçə raketin Pakistanla sərhəddə yerləşən Sistan-Bəlucistan əyalətində bir şəhərə düşdüyünü, nəticədə 3 qadın və 4 uşağın həlak olduğunu bildirib. Mətbuatda ölənlərin heç birinin iranlı olmadığı da bildirilib.
İranın Pakistandan dərhal açıqlama tələb etməsi xəbəri mətbuatda da əksini tapıb.
Xatırladaq ki, İran çərşənbə axşamı İsraillə əlaqəsi olduğunu iddia etdiyi Pakistandakı silahlılarının bazalarına hücum edib. Tehran İranın cənub-şərqindəki Rask şəhərində Pakistan sərhədində 12 mühafizəçinin öldürüldüyü hücumun məsuliyyətini üzərinə götürən Ceyş əl-Ədl adlı təşkilatın düşərgələrini hədəfə aldıqlarını açıqlayıb.
Pakistan dinc əhalinin güllələndiyini və iki uşağın öldüyünü bildirib.
İranın həftənin əvvəlində İraqın Ərbil şəhərinə və Suriyadakı İŞİD hədəflərinə hücumları da bölgədə böyük gərginliyə səbəb olub.
Gununsesi.info
