İşğaldan azad edilən ərazilərin minalardan təmizlənməsi prosesi hazırda sürətlə davam edir. 2021-ci ilin yanvar ayından bu günə qədər bizim pirotexniki qruplarımız Ağdam və Füzuli rayonlarının böyük hissəsinin minalardan təmizlənməsində iştirak edib.
Gununsesi.info xəbər verir ki, bunu Fövqəladə Hallar Nazirliyinin (FHN) Xüsusi Riskli Xilasetmə Xidmətinin (XRXX) rəis müavini general-mayor Məhərrəm Həsənov “Mina təhlükəsizliyi ilə bağlı əhalinin maarifləndirilməsində medianın rolu” mövzusunda jurnalistlər üçün keçirilən təlim zamanı deyib.
O bildirib ki, bu işlərin görülməsində bu sahədə ixtisaslı pirotexnik-istehkam qrupları çalışır: “Onlar xüsusi kurslar keçiblər və beynəlxalq sertifikatlara sahibdirlər. Minatəmizləmə çox incə prosesdir və xüsusi diqqət tələb edir. Minatəmizləmə prosesinə eyni zamanda XRXX-nin kinoloji xidmətinin xüsusi təlim keçmiş itləri də cəlb olunub. Bizim azad olunmuş ərazilərdə bundan sonra da görəcəyimiz işlər çoxdur. Azərbaycan Ordusu dünyaya öz sözünü dedi. Ordumuz dünyanın ən güclü orduları sırasındadır. Media nümayəndələrinin də burada rolu böyükdür. Jurnalistlər böyük fədakarlıqla işğaldan azad olunan ərazilərdə bərpa və quruculuq işləri ilə məşğul olan insanları maarifləndirməlidirlər”.
Gununsesi.info
