Türkiyə İsrailin “Qəzzaya nüvə bombası atacağıq” təhdidindən sonra hərəkətə keçir.
Gununsesi.info xəbər verir ki, Türkiyənin BMT Təhlükəsizlik Şurası vasitəsilə İsraildə nüvə silahı iddialarını araşdırmaq üçün tövsiyələr verə biləcəyi gözlənilir.
Türkiyə prezidenti Rəcəb Tayyib Ərdoğanın İsrailin baş naziri Binyamin Netanyahuya “Atom bombanız var, nüvə bombanız var və bununla təhdid edirsiniz” sözləri bir daha bu mövzuda İsrailə qarşı atılacaq addımlara diqqət çəkib.
Oktyabrın 7-dən Qəzzaya havadan, qurudan və dənizdən hücumlar həyata keçirən İsrailin İrs naziri Amihai Eliyahunun Qəzzaya nüvə bombası atıla biləcəyini deməsindən sonra beynəlxalq ictimaiyyətin susması nüvə silahı ilə bağlı ikili standartları da ortaya qoyub.
Bildirilir ki, Fransanın dəstəyi ilə nüvə silahına sahib olan Təl-Əviv nüvə silahlarını havadan təyyarələrlə və ya “Jericho” adlı çoxpilləli ballistik raketlərlə ata bilər. İsrailin nüvə başlıqları ilə təchiz olunmuş qanadlı raketləri daşımaq üçün Almaniyadan aldığı və dənizdən atdığı “Delfin” adlı sualtı qayıqlarda bəzi dəyişikliklər etdiyi barədə də bir çox təsdiqlənməmiş məlumatlar var.
Ekspertlər İsrailin Yaxın Şərqdə nüvə silahına sahib olan ilk ölkə olmaq istəmədiyi üçün bunu gizlətdiyinə diqqət çəkir. İranın nüvə silahı yaradacağından qorxaraq ona möhlət verməyən İsraillə bağlı ABŞ və Avropanın susması ikili standart kimi qiymətləndirilir. Beynəlxalq Atom Enerjisi Agentliyinin (BAEA) prezidenti Rafael Mariano Grossi sonuncu dəfə sentyabr ayında İranla “ciddi və müntəzəm” əməkdaşlığa çağırıb.
Beynəlxalq Atom Enerjisi Agentliyinin işə qarışması və İsraildə təftiş və ya təftişlər aparması üçün İsrail Nüvə Silahlarının Yayılmaması Müqaviləsinin (NPT) tərəfi olmalıdır. Müqavilə bu il 55-ci ildönümünü qeyd edərkən, İsrail NPT-ni imzalamaqdan imtina edir.
Gununsesi.info
