BMT-nin Soyqırım Konvensiyasını pozduğu üçün Beynəlxalq Ədalət Məhkəməsində İsrailə qarşı qaldırılan işin ilk iclası başlayıb.
Gununsesi.info xəbər verir ki, İsrailin Qəzzada törətdiyi qeyri-insani soyqırım cinayətlərindən sonra açılan işin ilk məhkəməsi Haaqada keçirilir.
Mərkəzi ofisi Hollandiyanın Haaqa şəhərində yerləşən İclas Məhkəməsində tərəflərin iştirak etdiyi zalda ictimaiyyətə açıq keçirilən dinləmə canlı yayımlanır.
Bugünkü iclasda Cənubi Afrikanın müvəqqəti tədbirlərlə bağlı tələbləri dinləniləcək, sabahkı iclasda isə İsrail nümayəndə heyəti müdafiə edəcək.
Dinləmə Cənubi Afrika tərəfini təmsil edən hüquqşünaslardan professor Con Duqardın təqdimatı ilə başlayıb. Duqard aparteid dövründə Cənubi Afrikada yaşamış və aparteid əleyhinə fəal şəkildə dayanan bir hüquqşünas kimi seçilir.
2001-2008-ci illər arasında BMT-nin Fələstində İnsan Haqları üzrə Xüsusi Məruzəçisi vəzifəsində çalışan Duqard eyni zamanda Məhkəmədə müxtəlif işlərdə müvəqqəti hakimlik edib.
Daha əvvəl iki saat olaraq elan edilən dinləmələrin müddəti İsrailin tələbi ilə üç saata çatdırılıb.
Cənubi Afrika dekabrın 29-da verdiyi yazılı ərizəsində məhkəmədən İsrailə qarşı 9 ilkin göstəriş verməsini istəyib.
Cənubi Afrikanın tələb etdiyi ehtiyat tədbirləri arasında İsrailin Qəzzada hərbi əməliyyatları dərhal dayandırması, fələstinlilərə qarşı soyqırımın qarşısının alınması üçün lazımi tədbirləri görməsi, köçkünlərin öz evlərinə qayıtmasını və lazımi qida, su, yanacaq, tibbi və gigiyena ləvazimatları ilə təmin olunmasını təmin etməsi də var. Buraya humanitar yardıma çıxışın təmin edilməsi, soyqırımda iştirak edənlərin cəzalandırılması üçün lazımi addımların atılması, soyqırım sübutlarının qorunması və görülmüş tədbirlərin icrası ilə bağlı Məhkəməyə mütəmadi hesabatların təqdim edilməsi daxildir.
Beynəlxalq Ədalət Məhkəməsi Birləşmiş Millətlər Təşkilatının (BMT) razılaşmalarına və beynəlxalq müqavilələrə tabe olan məsələlərin həllində BMT-nin məhkəmə orqanı kimi çıxış edir.
BMT-nin 1948-ci il “Soyqırımın qarşısının alınması və cəzalandırılması haqqında” Konvensiyasının 9-cu maddəsinə uyğun olaraq, əgər dövlət bu konvensiyanın maddələrini pozarsa, konvensiyanın iştirakçısı olan istənilən dövlət onu pozan dövlətə qarşı BƏM-də iddia qaldıra bilər.
Cənubi Afrika Respublikası dekabrın 29-da İsrailin Qəzzada 7 oktyabrdan bəri törətdiyi hərəkətlərlə Soyqırım Konvensiyasını pozduğunu əsas gətirərək Beynəlxalq Ədliyyə Məhkəməsində iddia qaldırmış və İsrailə qarşı müvəqqəti qadağa tələb edib.
Cənubi Afrika vəziyyətin aktuallığına görə Beynəlxalq Ədalət Məhkəməsindən qərar çıxarmasını tələb edərkən, dinləmələr başa çatdıqdan sonra Məhkəmə tərəflərin ifadələrini və sübutlarını araşdıraraq qərar üçün danışıqlara başlayır.
Hakimlərin öz qərarlarını elan etmələri üçün məcburi heç bir müddət olmasa da, ilk növbədə məhkəmə proseslərinə nəzər saldıqda, soyqırım kimi təxirəsalınmaz işlərdə bu müddətin bir neçə həftə olduğu görünür.
Gununsesi.inf
