İsrail əsgərlərinin Negev səhrasındakı Sde Teiman həbsxanasında saxlanılan fələstinliyə cinsi işgəncə verdikləri anların təhlükəsizlik kamerası görüntüləri yayımlanıb.
Gununsesi.info xarici mediaya istinadən xəbər verir ki, Kanal 12 televiziyasında yayımlanan görüntülərdə çox sayda məhbus fələstinli məftillərlə əhatə olunmuş yerdə üzüstə yerə uzanmış vəziyyətdə görünür.
Bu vaxt kamera İsrail əsgərlərinin yerdə uzanmış bir fələstinlini götürüb başqa əraziyə apardığını lentə alıb.
Bəzi əsgərlərin nəzarətə alınan fələstinliyə cinsi işgəncə verməsi, digər əsgərlərin isə qalxanlardan istifadə edərək o anların təhlükəsizlik kamerasına düşməsinin qarşısını almağa çalışması diqqət çəkir.
Kanal 12 bildirib ki, əsgərlər yəqin ki, təhlükəsizlik kameralarından xəbərdardır və öz hərəkətlərini qalxanlarla gizlətməyə çalışırlar.
Xəbərdə İsrail əsgərlərinin nəzarətə alınan fələstinliyə işgəncə verildiyi bildirilir. Cinsi işgəncələrə məruz qalan fələstinlinin qanlar içində xəstəxanaya aparıldığı paylaşılıb.
İsrail hərbi polisi iyulun 29-da 10 İsrail əsgərini bir fələstinliyə cinsi işgəncə vermək ittihamı ilə həbs etmək üçün Sde Teymana gəldikdən sonra saxlanılacaq əsgərlərin müqaviməti nəticəsində insidentlər yaşanıb.
Bəzi İsrail nazirləri, xüsusilə də ifrat sağçı Milli Təhlükəsizlik Naziri Itamar Ben-Qvir və Maliyyə Naziri Bezalel Smotrich cinsi işgəncədən istifadə edən əsgərlərə dəstək mesajları verib.
Bu mesajlardan dərhal sonra parlament üzvləri də daxil olmaqla bir çox ifrat sağçı israilli Sde Teymana basqın edib.
Oxşar qruplar axşam saatlarında saxlanılan əsgərlərin aparıldığı hərbi məhkəmənin yerləşdiyi Beyt Lid bazasına zorla daxil olmuşdu.
İfrat sağçı ekstremistlərin bir gündə iki hərbi bazaya basqın etməsi İsraildə gərgin müzakirələrə səbəb olub.
Həbs edilən 10 əsgərdən 5-i İsrail məhkəməsi tərəfindən sərbəst buraxılsa da, digərləri ilə bağlı istintaq davam edir.
İsrail məhkəməsi cinsi işgəncədə ittiham olunan 5 əsgərin həbs müddətini avqustun 11-i bazar gününə qədər uzadıb.
İsrailin cənubunda yerləşən və məhbus qəzzalıların saxlandığı Sde Teiman təcridxanası tez-tez işgəncələrlə gündəmə gətirilir.
Keçən ay New York Times qəzetində dərc olunan xəbərdə Sde Teiman həbsxanasında saxlanılan qəzzalıların gündə 18 saata qədər açıq yerdə, gözləri bağlı və qandallı halda səssizcə yerə oturtulduqları bildirilmişdi.
Xəbərdə təcridxanaya gətirilən fələstinli məhbusların 3 aya qədər orada qaldığı, sorğu-sual proseslərində çox sayda insanın qeyri-insani rəftar və işgəncələrə məruz qaldığı bildirilib.
Burada saxlanılan və sonradan sərbəst buraxılan bəzi qəzzalılar Sde Teimanda məruz qaldıqları işgəncələrdən danışıblar.
Şəbnəm
Gununsesi.info
