İsrail ordusu blokada altındakı Qəzza zolağının cənubundakı Xan Yunus şəhərində Fələstin Qızıl Aypara Cəmiyyətinin ofis binasının yuxarı mərtəbələrini atəşə tutub, çoxlu sayda fələstinli yaralanıb.
Gununsesi.info xəbər verir ki, Fələstin Qızıl Aypara Cəmiyyəti ofisdə məcburi köçkün fələstinlilərin olduğunu bildirib.
Dekabrın əvvəlində İsrail ordusu Qəzza zolağının cənubundakı Xan Yunus şəhərini döyüş zonası elan edib və 4 rayonun sakinlərini təxliyyə etmək zərurəti ilə bağlı xəbərdar edib.
Beləliklə, İsrail daha əvvəl təhlükəsiz zona elan etdiyi Qəzza zolağının cənubunda genişmiqyaslı hücumlara başladığının siqnalını verib.
Həmçinin ayın əvvəlindən Qəzzanın cənubuna İsrail hava hücumları intensivləşib və quru bölmələri Xan Yunusun bir sıra ərazilərini işğal edib.
Qəzza Səhiyyə Nazirliyinin məlumatına görə, oktyabrın 7-dən İsrail tərəfindən öldürülən fələstinlilərin sayı 6,2 mini qadın və ən azı 8,2 mini uşaq olmaqla 20 min 674 nəfərə çatıb. İsrailin hücumları nəticəsində daha 54 536 fələstinli yaralanıb.
Gununsesi.info
