Jirnovskinin SSRİ-ni bərpa etmək barədə səsləndirdiyi bəyanat daha çox Rusiyanın maraqlarına zərbə vurur.
Bunu Gununsesi.info-ya açıqlamasında MilliMəclisin (MM) Müdafiə, təhlükəsizlik, korrupsiya ilə mübarizə komitəsinin üzvü, millət vəkili Zahid Oruc deyib.
Onun sözlərinə görə, bu gün Rusiya prezidenti Vladimir Putin və onun komandası dünyanı inandırmağa çalışır ki, onlar imperiya qurmaq niyyətlərində deyillər:
“Onlar suveren dövlətlərin hüquqlarını tanıyır və ona hörmət edirlər. Belə olan halda Jirinovskinin 10 illiklər ərzində formalaşan gerçəkliyi nəzərə almadan səsləndirdiyi bəyanat ilk olaraq Rusiya prezidenti Putinin planlarını alt-üst edir. İkincisi, Jirinovskinin ideyası Lenin ideyaları kimi cazibəli deyil. Jirinovski bu ideyası ilə nəinki digər xalqları, heç öz Rus xalqını inandıra bilməyəcək ki, ölkələri Rusiya sərhəddinə daxil etməklə nə qazanacaq?!
Çünki SSRİ-dən ən çox əziyyət çəkən xalq elə ruslar özləri olub. Ruslar SSRİ dövründə öz imkan və resurlarından yetərincə istifadə edə bilməyiblər. O zaman bir elita formalaşmışdı ki, bu elitanın nə ruslara, nə də digər respublikalara aidiyyatı var idi.
Burada digər əsas məqam ondan ibarətdir ki, bu fikirlərin ideya cazibədarlığı olmadığı kimi, iqtisadi cəhətdən də ciddi problemlər yaradır. Rusiya müasir hərbi imkanlar baxımından böyük ambisiyalara malik olsa da, texnoloji cəhətdən Qərbdən asılı ölkədir”.
Millət vəkili sual edib ki, Rusiya bu ölkələri bir araya gətirsə belə, hər hansı böyük iqtisadi layihəni reallaşdırmaq üçün texnoloji avadanlığı haradan alacaq.
“Təbii ki, Qərbdən.. Bu, bir daha bu ideyanın mümkünsüzlüyüni göstərir. Çünki müasir innovativ texnologiyalar Qərbdədir. Rusların nanotexnologiya mərkəzləri innovativ texnologiya ilə bağlı bir sıra layihələr həyata keçrimək istədilər, ancaq sonadək onu reallaşdıra bilmədilər. Effektli olmadı ”- deyə, o, vurğulayıb.
Z.Orucun fikrincə, Azərbaycan Jirinovski və onun kimilərin bəyanatlarına fikir vermədən öz siyasətini davam etdirməlidir.
“Jirinovski kimilər nə qədər çarizm, arxiv düşüncə tərzində qalacaqlarsa, bu, ilk növbədə elə Rusiyanın maraqlarına zərbə vurmaqla, onun iqtisadi inkişafına əngəllər yaradacaq. Bir daha təkrar edirəm ki, belə yanaşmalar Rusiyanı irəli deyil, geriyə atacaq. Belə təşəbbüs və çıxışlar onun ətrafında olan ölkələri də ondan qaçıracaq. Bu cür fikirlər eyni zamanda, Qərbdəki anti-Rusiya mövqeyində olan qüvvələrin arqumentlərini daha da gecləndirəcək”- deyə, millət vəkili bildirib.
Mürtəza
Gununsesi.info
