Almaniyada katolik kilsəsinin kilsələrdə cinsi zorakılığa məruz qalanlara əziyyətlərinə görə kompensasiya olaraq ödədiyi təzminatın məbləğinin 57 milyon avroya çatdığı bildirilib.
Gununsesi.info xəbər verir ki, Bonn şəhərində müstəqil kompensasiya komissiyasının açıqladığı 2023-cü il hesabatına görə, təkcə keçən il cinsi istismara məruz qalanlara 16 milyon avrodan çox pul ödənilib.
Müstəqil təzminat komissiyasının sədri Marqarete Reske 2023-cü ilin iyun ayında Köln məhkəməsinin cinsi zorakılıq qurbanına 300 min avro təzminat ödəməyə qərar verdiyini və Köln baş yeparxiyasının bu təzminatı ödəməli olduğunu bildirib.
Reske 2021-ci ildə verilən qərarlarda ödəniləcək təzminat məbləğinin 22 min avro ilə 25 min avro arasında olduğu halda, 2023-cü ildən etibarən təzminat məbləğlərinin adambaşına 50 min avronu keçəcəyini bildirib.
Komissiya qeyd edib ki, hələ də baxılmayan sənədlər var və 2021-ci il yanvarın 1-dən qurbanlara ödənilən təzminatın ümumi məbləği 57 milyon avroya çatıb.
Keçən illərdə Almaniyadakı Katolik Kilsələrində çoxlu sayda insanın, əsasən də uşaqların cinsi istismara məruz qaldığı üzə çıxıb.
Gununsesi.info
