Ötən gecə ABŞ-Kanada sərhədində baş verən və terror şübhəsi ilə böyük panikaya səbəb olan partlayışın təfərrüatları məlum olub.
Gununsesi.info xəbər verir ki, ABŞ-Kanada sərhədində partlayışa səbəb olan avtomobilin 300 min dollar dəyərində lüks “Bentley Flying Spur” model avtomobil olduğu öyrənilib. Qəzada nəqliyyat vasitəsini idarə edən 56 yaşlı iş adamının və həyat yoldaşının öldüyü açıqlanıb.
Hadisə ilə bağlı istintaq davam edərkən, cütlüyün partlayışdan əvvəl qumarxanası da olan “Seneca Niagara” adlı oteldə qaldıqları öyrənilib. Səlahiyyətlilər hələ adı açıqlanmayan cütlüyün Nyu-Yorkda yaşadığını qeyd edərkən, CNN cütlüyün çox məşhur bir ailəyə aid olduğunu açıqladı.
ABŞ mətbuatına danışan rəsmilər cütlüyün “Kiss” rok qrupunun konsertinə getdiklərini bildiriblər.
Federal Təhqiqat Bürosunun (FTB) verdiyi açıqlamada Niaqara çayı üzərindəki Göy qurşağı körpüsündə partlayış baş verdiyi və səbəbin araşdırıldığı bildirilib.
Sərhəd keçid məntəqəsindəki səlahiyyətlilər, körpüdən keçən avtomobilin partlaması nəticəsində Göy qurşağı körpüsündəki keçidin və Kanadanın Ontario əyalətini ABŞ-ın Nyu-York əyalətinə birləşdirən digər 3 keçidin ehtiyat tədbiri olaraq bağlandığını bildirib.
Sosial mediada paylaşılan foto və videolarda alovlar içində bir təhlükəsizlik məntəqəsinin görüntüləri əks olunub.
Gununsesi.info
