Bolqarıstanın hökuməti xüsusi xidmət orqanlarından şənbə günü Krım körpüsündə partlayan yük maşını ilə bağlı məlumat istəyib.
Bu barədə hökumətin sözçüsü Anton Kutev Bolqarıstan milli televiziyasına açıqlama verib.
“Hökumət Krım körpüsündə partlayan yük maşını ilə bağlı yoxlamalar aparır və xüsusi xidmət orqanlarından bu barədə məlumat tələb edir”, – deyə Kutev qeyd edib.
Rusiya İstintaq Komitəsinin rəhbəri Aleksandr Bastrıkin bildirib ki, partladılmış yük maşınının marşrutu müəyyən edilib. Yük maşını Bolqarıstandan Gürcüstana, oradan isə Ermənistan, Şimali Osetiya və Krasnodar diyarına yola düşüb. Yük maşınının hərəkətinin təşkilində iştirak edən şəxslər də müəyyən edilib.
Şənbə günü Krım körpüsü üzərində qonşu yük qatarının çənləri də alovlanıb. Üç nəfər ölüb. Körpünün yarımadaya doğru gedən avtomobil hissəsinin iki aşırımı dağılıb.
Gununsesi.info
