Aprel döyüşlərində qələbənin ildönümü münasibəti ilə Lənkəran Dövlət Universitetində (LDU) tədbir keçirilib.
LDU-nin mətbuat xidmətindən Gununsesi.info-ya verilən məlumata görə, əvvəlcə Aprel şəhidlərinin müqqəddəs xatirəsi tədbir iştirakçılar tərəfindən bir dəqiqəlik sukutla yad olunub.
Aprel döyüşlərində Azərbaycan ordusunun əldə etdiyi qələbənin ildönümü ilə əlaqədar LDU-də keçirilən tədbir vətənpərvər ruhu, mübarizlik əhval ruhiyyəsi, torpaqlarımızın düşmən tapdağından azad olunması uğrunda canını fəda etmiş şəhid eloğullarımızın xatirəsinə ehtiram və hörmət ,qələbəyə inam amalı ilə diqqətçəkən olub. Lənkəran şəhərində yerləşən N saylı hərbi hissənin əsgər və zabit heyətinin, şəhid valideynlərinin, ikinci Qarabağ savaşı veteranlarının dəvət edildiyi tədbirdə LDU-nun professor-müəllim-tələbə heyəti iştirak edib.
Tədbiri açan universitetin kafedra müdiri ,filologiya üzrə fəlsəfə doktoru Kamran Kazımov ötən ilin Aprel döyüşlərində ordumuzun qazandığı qələbəni müasir Azərbaycan hərb tarixinin parlaq səhifəsi adlandırıb, torpaq uğrunda qurban gedən şəhidlərin qədirbilən xalqımızın, xüsusən gənc nəslin yaddaşında daim yaşayacağını, zaman-zaman xatırlanacağını bildirib.
Azərbaycanın Milli Qəhrəmanı, şəhid Əsgər Əliyevin atası Ələkbər Əliyev çıxışında şəhid ailələrinə göstərilən diqqət və ehtiramdan danışıb.
Milli Qəhrəmanın atası ötən ilki Aprel döyüşlərində erməni tapdağından azad olunmuş torpaqları oğlunun şəhid ruhuna, özü kimi şəhid valideynlərin ürəyinə təskinlik adlandırıb və Azərbaycan bayrağının Xankəndində, Şuşada dalğalanacağı günün uzaqda olmadığını bildirib.
Universitet tələblərinin hazırladığı qələbə ruhlu musiqili-ədəbi bədii kompozisiya “Vətən marşı”nın ifası ilə başlanıb.Tələbələrdən Xaqani Bədəlov, Babək Cəfərov, Günel Babazadə, Səyyar Ağazadə və başqalarının ifa etdikləri vətənpərvər ruhlu şer və manhılar, səhnəciklər gənc nəslin qələbəyə inamı, mübariz əhval-ruhiyyəsi, kövrəkliyi və səmimiliyi ilə diqqət çəkib. Qələbəyə çağırış ruhlu tədbir “Əsgər marşı” ilə yekunlaşıb.
Xatırladaq ki, Aprel döyüşlərində qələbənin ildönümü ilə bağlı keçirilən umumrayon tədbirində də LDU–nun tələbə və müəllim heyəti fəal iştirak edib.
Həmçinin Lənkəran şəhərində Heydər Əliyev Mərkəzində keçirilən tədbirdə çıxış edənlər arasında LDU-nun tələbəsi Orxan Əmənov da olub. Universitet gənclərini təmsil edən O.Əmənov çıxışında tələbələrin milli ordumuzun Aprel döyüşlərində qazandığı qələbədən ruhlandığını, bu döyüşlərdə həlak olmuş əsgərlərin qəhrəmanlığı ilə fəxr etdiyini, torpaqlarımızın işğaldan azad olunması naminə vuruşmağa hər an hazır olduqlarını tədbir iştirakçılarının nəzərinə çatdırıb.
Qeyd edək ki, universitetdə gənc nəslin vətənpərvərlik ruhunda tərbiyə olunması istiqamətində ardıcıl iş aparılır, mütəmadi olaraq rəngarəng tədbirlər keçirilir.
Gununsesi.info
