Lənkəran Dövlət Universitetində (LDU) Lənkəran, Astara, Masallı, Lerik, Yardımlı, Cəlilabad və Biləsuvar rayonlarını təmsil edən İX, X, XI sinif şagirdləri, Lənkəran Humanitar Kolleci, Astara Pedaqoji Kolleci, Masallı Dövlət Regional Kollecinin tələbələri arasında fizika, riyaziyyat, kimya, biologiya fənləri üzrə keçirilən regional olimpiada qaliblərinin mükafatlandırma mərasimi olub. Mərasimdə bilik yarışmasından qalib çıxaraq I, II,III yeri tutan şagird və tələbələr, onların valideynləri, rayonların təhsil şöbələrinin rəsmiləri, müəllimlər, media nümayəndələri iştirak edib.
Gununsesi.info xəbər verir ki, mərasimi Lənkəran Dövlət Universitetinin rektoru vəzifəsini icra edən professor Natiq İbrahimov açıb. İştirakçıları salamlayan professor Natiq İbrahimov bu günkü tədbiri nəinki universitetin , həmçinin bölgənin elmi həyatında vacib hadisələrdən biri adlandırıb. ”Elm, bilik işıqdır. Biz çox fəxr edirik ki, bölgənin, ölkənin elminə işıq tutacaq gələcək elmi potensialımızın üzə çıxarılması kimi məsuliyyətli, xeyirxah bir fəaliyyəti həyata keçiririk. Bu günün qalibləri elmimizin sabahkı flaqmanıdır” –deyən universitet rəsmisi müxtəlif fənlər üzrə olimpiadaların, bilik yarışmalarının bundan sonra da keçiriləcəyini bildirib.
N.İbrahimov rayon təhsil şöbələrinin rəhbərlərinə, müəllimlərə, valideynlərə LDU kollektivi adından olimpiadaya dəstək olduqlarına görə təşəkkür edib.
Təbrik nitqindən sonra qaliblərin mükafatlandırılması mərasimi olub. I, II, III yeri tutan şagird və tələbələrə universitetin diplomları , kubok və qiymətli hədiyyələri verilib.
Mərasimdə Lənkəran rayon təhsil şöbəsinin müdiri Aslan İbrahimov, Lənkəran Rayon Ağsaqqallar Şurasının sədr müavini, universitetdə fəaliyyət göstərən ictimai şuranın sədri Sərhad Məmmədov, “İstək” liseyinin direktoru Saday Möhnətov , Astara rayon təhsil şöbəsi metodkabinetinin müdiri Emin Fətəliyev, valideyn, Lerik rayon sakini Dilarə Fətullayeva və başqaları çıxış edərək universitet rəhbərliyinə belə möhtəşəm olimpiadanı təşkil etdiklərinə və obyektiv qiymətləndirməyə görə minnətdarlıq ediblər.
Sonda xatirə şəkilləri çəkilib.
Xatırladaq ki, regional olimpiadada bölgəni təmsil edən təhsil müəssisələrindən 250-dən artıq şagird və tələbə iştirak edib.
Esmira İsmayılova,
LDU-nun mətbuat xidməti
Gununsesi.info
