Gununsesi.info-nun məlumatına görə, məktubda deyilir:
“Hörmətli cənab Prezident. Los-Ancelesdəki yəhudi icmasının liderləri olaraq, müsəlman dünyasında ilk dünyəvi respublika (1918-1920) və qadınlara səsvermə hüququ vermiş (1919) ilk müsəlman ölkəsi olan AXC-nin 100-cü ildönümü münasibətilə Sizi səmimi qəlbdən təbrik edirik. Çox şadıq ki, Azərbaycan xalqı bu tarixi ildönümü özünün yenidən müstəqil olan və çiçəklənən dövləti – Azərbaycan Respublikası ilə qeyd edir.
Eyni zamanda, 1990-cı illərin əvvəllərində Azərbaycanın müstəqilliyini ilk tanıyan dövlətlərdən olan və Bakıda səfirliyini təsis edən İsrail ilə Azərbaycan arasında yaxın dostluq münasibətlərinə də böyük dəyər veririk. Ötən dövr ərzində Azərbaycan-İsrail tərəfdaşlığı inkişaf edərək iki ölkə üçün yüksək önəm daşıyan bir çox sahələri əhatə edib. Bu nümunəvi ikitərəfli münasibətlər, eləcə də hər iki ölkənin xalqları arasındakı əlaqələr gündən-günə güclənərək sarsılmaz və davamlı körpülərin yaranmasına gətirib çıxarıb.
İki min ildən çoxdur Azərbaycanda yaşayan qədim yəhudi icması Azərbaycan ilə İsrail arasında bu körpülərin saxlanılmasında mühüm rol oynamaqdadır ki, bu da nadir bir fenomendir. Qeyri-sabit regionda yerləşməsinə baxmayaraq, Azərbaycanda antisemitizmin hər hansı bir formasının mövcud olmaması, həmçinin müsəlman, yəhudi və xristianların bütün hüquq və azadlıqlara malik olaraq, sabit və təhlükəsiz şəraitdə dinc birgə yaşamaları Azərbaycandakı dinlərarası harmoniya, tolerantlıq və qarşılıqlı hörmət mühitinin mövcudluğunun bariz göstəricisidir. Sizin uzaqgörən liderliyiniz və bir-biri ilə ahəng təşkil edən bu dəyərlərin bir müstəsna hal deyil, gündəlik həyat tərzi olmasını təmin etmək istiqamətində göstərdiyiniz nümunə olduqca təqdirəlayiqdir.
Los-Ancelesdəki yəhudi icması Azərbaycanın buradakı Baş konsulluğu ilə bir çox siyasi və mədəni məsələlər, o cümlədən burada yerli icmaların ölkənizdə yüksək hörmət göstərilən yəhudi icması və Azərbaycanın İsrail Dövləti ilə möhkəm tərəfdaşlığı barədə məlumatlandırılması sahələrində açıq dialoq və sıx münasibətlər saxlanmaqdadır. Bu tarixi ildönümü münasibətilə Sizi bir daha təbrik edir, Sizə və ölkənizə böyük uğurlar və davamlı tərəqqi arzulayırıq”.
Məktubu Böyük Los-Anceles Yəhudi Federasiyasının İdarə Heyəti və İcraiyyə Komitəsinin üzvü, Universitet Sinaqoqunun sabiq prezidenti Maykl Tuşin, Simon Vizental Mərkəzinin sədr müavini Ravvin Abraham Kuper, Amerika Yəhudi Komitəsinin Los-Anceles nümayəndəliyinin prezidenti Skot Edelman, Böyük Los-Anceles Yəhudi Federasiyasının prezidenti və baş icraçı direktoru Cey Senderson, Universitet Sinaqoqunun baş ravvini, Cənubi Kaliforniya Ravvinlər Şurasının sabiq prezidenti Ravvin Morli Fainstayn, Kehillat Maarav Qərb Sinaqoqunun baş ravvini Ravvin Maykl Qotlib, Ədalət naminə Yəhudi Mərkəzinin icraçı direktoru Ravvin Coel Saymonds, Wilshire Boulevard Sinaqoqunun sabiq prezidenti Riçard Paçulski, Los-Anceles Sinay Sinaqoqunun prezidenti Ancela Maddahi, Amerikadakı İran Yəhudiləri Federasiyasının prezidenti Suzan Azizzade və Nessah Sinaqoqunun qurucusu və baş ravvini Ravvin Devid Şofet imzalayıblar.
