Xalqın ruhunu ölməyə qoymayan şair Məmməd Arazın poeziya günü keçiriləcək.
Bunu Gununsesi.info-ya açıqlamasında “Məmməd Araz Poeziya günü”-nün İşçi qrupunun mümayəndəsi, şair Qardaşxan Əzizxanlı deyib.
Onun sözlərinə görə, “Məmməd Araz Poeziya günü” ilk dəfə olaraq, dahi şairin doğum günündə- oktyabrın 14-də keçiriləcək.
“İlk olaraq tədbir iştirakçıları saat 14.00-da Fəxri xiyabanda şairin məzarını ziyarət edəcək. Daha sonra məclis Azərbaycan Yazıçılar Birliyinin “Natəvan klubu”nda davam etdiriləcək”- deyə, o vurğulayıb.
Tədbirin keçirilməsinin məqsəd və hədəfindən danışan Q.Əzizxanlı bildirib ki, Azərbaycanda bir sıra şair və ədiblərin poeziya və xatirə günləri keçirilir: “Biz də 2015-ci ildə müasir Azərbaycanın dahi şairi Məmməd Arazın poeziya günü keçirilməsi ilə bağlı ortaq bir fikrə gəldik”.
Hədəfə gəldikdə isə Q.Əzizxanlı bildirib ki, Məmməd Arazla söhbətlərinin birində Məhəmmədhüseyn Şəhriyarın poeziyasının özəlliyindən danışırdıq: “Belə bir nəticəyə gəldik ki, insanda olduğu kimi yaradıcılqda da, əsas məsələ ruhdur. Digər bütün poetik məziyyətlər, ondan sonrakı məsələdir. Məhşur fransız filosofu Gustav Lebonun dediyi kimi: “Xalq çox şey itirə bilər. Böyük məhrumiyyətlərə məruz qala bilər, amma yenidən ayağa qalxıb itirdiklərini bərpa edər. Əgər bir xalq öz ruhunu itirərsə, demək hər şeyini itirib””.
O, əlavə edib ki, Şəhriyar yaradıcılığında olduğu kimi, Məmməd Araz yaradıcılığında da xalqın ruhu qorunur və buna önəm verilir: “Məmməd Araz da vətənpərvərlik ruhunun aşılamasında, xalqın ruhunu oyanmasında müstəsna rola malik olan şairdir. Məhz belə şəxsiyyətlərin hesabına xalq yaşayır və gələcəyi uğrunda mübarizə aparır. Bax bu səbəbdən də belə bir tədbirin keçirilməsini qərara aldıq və onu reallaşdırırıq”.
Q.Əzizxanlı onu da əlavə etdi ki, bu gün M.Araz yaradıcılığı birləşdirir və mərkəzçiliyə xidmət edir. Və onun poeziyası ilə hamı bir araya gəlir: “Necə deyərlər ki, “qaçan da, qovan da” Məmməd Araz yaradıcılığına üz tutur”.
Q.Əzizxanlı sonda ümidvar olduğunu bildirib ki, Məmməd Araz poeziyası günləri ənənəyə çevriləcək.
Mürtəza
Gununsesi.info
