Azərbaycan Xalq Cəbhəsi Partiyasının (AXCP) sədri Əli Kərimlinin keçmiş cangüdəni Niyaməddin Əhmədovun ailə üzvləri ilə telefonla danışmasına və görüşməsinə 9 aydır icazə verilmir.
Məlumata görə, istintaq təcridxanasında saxlanılan Əhmədov ailə üzvləri ilə görüş və telefon danışığı hüquqlarının təmin edilməsi üçün növbəti dəfə məhkəməyə müraciət edib. Atası Arif Əhmədov bildirib ki, 9 aydır ailəsi onunla əlaqə yarada bilmir.
“Bizim müraciət etmədiyimiz yer qalmayıb. Təqsirsiz gənci həbs ediblər, indi isə anası ilə danışmasına belə icazə vermirlər”, – deyə Arif Əhmədov bildirib.
Penitensiar Xidmətdən şərh almaq mümkün olmayıb.
Xatırladaq ki, aprelin 16-da Xətai rayon məhkəməsi AXCP fəalı Niyaməddin Əhmədovu karantin qaydalarını pozma və polisə tabe olmama ittihamı ilə 30 gün müddətinə həbs edib.
Hüquq müdafiəçiləri N.Əhmədovu siyasi məhbus kimi tanıyıb.
