Manat maliyyə bazarında ədalətli qiymətini axtarmaqdadır və bu proses manat öz qiymətini tapanadək davam edəcək.
Gununsesi.info xəbər verir ki, bunu maliyyə naziri Samir Şərifov deyib.
Onun sözlərinə görə, proses nə qədər davam edəcək və bu hal nə zaman baş verəcək, demək çox çətindir. “Onu deyə bilərəm ki, hökumət tezliklə manatın bazarda öz ədalətli qiymətini tapacağına ümid edir və hökumətin iqtisadi qurumları, xüsusən də İqtisadiyyat, Maliyyə nazirlikləri, Mərkəzi Bank, Maliyyə Bazarlarına Nəzarət Palatası bundan sonra ölkədəki makroiqtisadi vəziyyətin sabitləşməsinin təmin olunması istiqamətində tədbirlərini həyata keçirməyə başlayacaq”- deyə, nazir vurğulayıb.
Manatın devalvasiyaya uğramasının səbəblərini açıqlayan nazir deyib ki, bunun birinci amili tədiyyə balansında olan kəsirdir: “Belə ki, tədiyyə balansı ənənəvi olaraq ticarət balansı hesabına formalaşırdı. Ticarət balansımız da əvvəllər müsbət saldo olub. Bu da əsasən ixracaatın hesabına olurdu. İndi bu gəlirlər azaldığından tədiyyə balansında mənfi saldo yaranıb. Halbuki cari ildə ümumi tədiyyə balansımız praktik olaraq əvvəlki illərlə eynidir və bir qədər də müsbətdir. Amma bu müsbət saldo kapital hərəkətləri üzrə balansında mövcud olan mənfi saldonu bağlamağa imkan vermir. Ona görə də indi əsas vəzifəmiz qeyri-neft sektorunu inkişaf etdirib ixracaatı artırmaq, idxalata olan asılılığı azaltmaq və ixracatı təşviq , xarici srmayəni cəlb etməklə aradan qaldırmaqdır. Bununla bağlı dövlət bir sıra tədbirlər planı hazırlayıb həyata keçirməyə başlayıb”.
Nazir onu da əlavə edib ki, manatın ucuzlaşamsı ticarət balansımızın 6 mlrd manat həddinə çatmasına imkan yaratdı və bu da böyük nailiyyətdir.
“Hesab edirəm ki, bu proses davam etdirilməlidir və tədricən davam etdiriləcək. Məzənnə siyasəti də tədiyyə balansındakı kəsrin yumşaldılması xidmət edəcək”- deyə, nazir bildirib.
Mürtəza
Gununsesi.info
