Azərbaycanda media subyektlərinin əldə etdikləri gəlirlər vergidən azad olunacaq.
“Report”un xəbərinə görə, bununla bağlı Vergi Məcəlləsinə dəyişiklik təklif olunur.
Layihənin qeyd hissəsində əsaslandırılıb ki, “Media haqqında” qanunun 4-cü maddəsində medianın inkişafının təşviqi və media subyektlərinin fəaliyyətini stimullaşdırması nəzərdə tutulur. Həmin qanuna uyğun olaraq Vergi Məcəlləsinə dəyişikliklər edilməsi təklif olunur.
Belə ki, qanun layihəsinə əsasən media subyektlərinin (kütləvi informasiyanın dərc olunması və (və ya) yayımlanması olan fiziki (jurnalistlər istisna olmaqla) və ya hüquqi şəxslərin) öz fəaliyyətləri nəticəsində əldə etdikləri gəlirlərin, o cümlədən reklam gəlirlərinin gəlir vergisindən, mənfəət vergisindən və sadələşdirilmiş vergidən azad edilməsi təklif edilir.
Məcəlləyə dəyişiklik layihəsi qəbul ediləcəyi təqdirdə 2023-cü il yanvarın 1-dən tətbiq olunmaqla 3 il müddətində qüvvədə olacaq və audiovizual media subyektlərinə şamil olunmayacaq.
Gununsesi.info-nun xəbərinə görə, bu məsələnin həlli üçün Medianın İnkişafı Agentliyi təşəbbüs göstərib.
Agentliyin bu istəyyi müsbət qiymətləndirilib və qanun layihəsi formasında Milli Məclisə tövsiyyə olunub.
Afət Abbasova
Gununsesi.info
