“Mehman Hüseynov sıradan bir adam deyil, ictimai rəyə təsir edən blogerdir. Onun çəkib hazırladığı hər videosu son aylarda ictimai rəy yaradıb. M.Hüseynov iri məmur və nazirlərlə bağlı korrupsiya faktlarını açıqlayıb. Lakin bunların böyük hissəsi indiyədək araşdırılmayıb”.
Bu haqda Gununsesi.info-ya media hüquqları üzrə ekspert Ələsgər Əhmədoğlu bloger Mehman Hüseynovun saxlanmasına münasibət bildirərkən deyib. Ekspert bildirib ki, səbəb nə göstərilirsə göstərilsin, Mehman Hüseynov blogerer fəaliyyətinə görə saxlanılıb: “Bu hadisə idarəetmədə və təhlükəsizliklə bağlı ciddi problemlər olduğunu bir daha göstərir, ölkədə Daxili İşlər Nazirliyinə müraciət edilir və onun mətbuat xidməti «Biz də axtarırıq» deyirsə, bu, çox ciddi problemdir. Vətəndaşın təhlükəsizliyi dövlətə əmanətdir, bunun üçün dövlət məsuliyyət daşıyır”-, deyə o bildirib.
Ə.Əhmədoğlu qeyd edib ki, blogerin 14-15 saatdan sonra polisdə olmasının üzə çıxması da yaxşı hal deyil: “BMT-nin 2006-cı ildə qəbul edilmiş məcburi yoxaçıxmalarla bağlı konvensiyası var. Orda dövlət orqanlarının bu tip insanları oğurlayıb, xəbər verməməsi cinayət əməli sayılır. Azərbaycan da BMT üzvü olduğu üçün bu konvensiyaya hörmətlə yanaşmalıdır. Yəni, Mehman Hüseynovun polis tərəfindən saxlanılmasının sonradan üzə çıxması dövlət qurumlarının cinayət şəbəkəsi kimi fəaliyyət göstərməsinin sübutudur”.
Qeyd edək ki, bloger Mehman Hüseynovun vəkili Elçin Sadıqov hazırda M.Hüseynovun Nəsimi rayn Məhkəməsinə aparıldığını yazıb
Xatırladaq ki, blogerin Avropada mühacir həyatı yaşayan qardaşı Emin Hüseynov yanvarın 9-da axşam saatlarından gənc blogger Mehman Hüseynovun yoxa çıxması barədə sosial şəbəkələrdə xəbərlər yayıb. Verilən xəbərə görə, Mehman Hüseynovun dostları ondan nə mobil telefon, nə də digər vasitələrlə xəbər tuta bilmirlər.
Emin Hüseynov isə bildirib ki, qardaşını kafedən çıxarkən bir neçə nəfər zorla, ağzını yumaraq aparıblar.
Mehmanın dövlət hüquq-mühafizə xidmətinin əməkdaşları tərəfindən həbs edilməsi və ya digər şəxslər tərəfindən oğurlanmasıyla bağlı hələ ki, məlumat əldə edilməyib.
Gülnaz Qənbərli
Gununsesi.info
