“Azərbaycanda insan haqları yüksək səviyyədə təmin olunub və vətəndaşların hüquqları qanunvericilik səviyyəsində müdafiə olunur”.
Bu fikri Gununses.info-ya açıqlamasında Milli Məclisin (MM) Hüquq siyasəti və dövlət quruculuğu komitəsinin sədr müavini Rövşən Rzayev Avropa Parlamentinin Azərbaycandakı insan haqqlarının vəziyyəti, son günlərdə baş verən həbslərlə bağlı keçirilən dinləmələrə mövqeyini açıqlayarkən deyib. Onun sözlərinə görə, Azərbaycanda insan haqları qorunur və tam azaddır. “İstər vətəndaşların sərbəst toplaşmaq, istər fikir plüralizmi, istərsə digər sahələrdə hüquqları yüksək səviyyədə təmin olunur”- deyə, R. Rzayev vurğulayıb. R.Rzayev deyib ki, sentyabrda keçiriləcək referendumun da elə əsas hədəfi ölkədə insan haqlarının fundamental müdafiəsinin təmin etməkdir. “Amma Azərbaycanın inkişafını gözügötürməyən istər daxildə, istərsə xaricdə olan qüvvələr məqsədyönlü şəkildə mütəmadi olaraq anti-Azərbaycan təbliğatı aparırlar. Avropa Parlamentində təşkil olunan bu dinləmə də belə kampaniyanın tərkib hissəsidir”- deyə, o bildirib.
Deputat bildirib ki, baxmayaraq Azərbaycanın əleyhinə olan deputatalar var, ancaq bununla belə, orada Azərbaycanı sevən və Avropa ilə Azərbaycan arasında isti münasibətlərin olmasını istəyən yetərincə parlamentarilər də mövcuddur. “Onlar Azərbaycanla Avropa ölkələri aarsında münasibətlərin keyfiyyətcə yeni müstəviyə çıxması istiqamətində fəaliyyət göstərirlər və biz onlarla işbirliyindəyik. Ancaq Azərbaycanın inkişafın istəməyən və ona maneçilik törədən qüvvələr də mövcuddur. Bu qüvvələr Rusiyada, Amerikada, Fransada, Almaniyada və Avropanın digər ölkələrində erməni lobbisinin təsiri altında fəaliyyət göstərirlər. Əslində onlar erməni lobbisindən öz şəxsi maraqları və karyeraları üçün yararlanaraq, Azərbaycan haqqında yalan və həqiqətə uyğun olmayan fikirlər səsləndirirlər. Artıq onların bu uydurmaları da keçmir. Dünya artıq onların dediyinə inanmır”- deyə, R. Rzayev bildirib. R. Rzayevin sözlərinə görə, yaxşı olardı ki, o qüvvələr işğalçı Ermənistanı öz ad ilə çağırsınlar: “Elə Azərbaycan mediası da mütəmadi olaraq onlardan işğalçını adı ilə çağrılmasını tələb etməlidir. Daha onların Azərbaycan haqqında dediklərinə yox”.
Mürtəza
Gununsesi.info
