Milli Məclisin yaxın zamanlarda Rəqabət Məcəlləsini müzakirəyə çıxaracağı gözlənilir.
Gununsesi.info xəbər verir ki, bunu Milli Məclisin İqtisadi siyasət, sənaye və sahibkarlıq komitəsinin sədri Ziyad Səmədzadə deyib.
Millət vəkili Vahid Əhmədov isə bu gün parlamentdə büdcə zərfinin müzakirəsi zamanı ölkə iqtisadiyyatında yaranmış durumu şərh edərkən bildirib ki, iqtisadiyyatın inkişafına mane olan əsas amil mövcud monopoliyadır: “Nə qədər ki, monopoliya hökm sürür, ölkə iqtisadiyyatının inkişafından danışmağa dəyməz. Ona görə də təklif edirəm ki, uzun illərdən bəri qəbulunu gözləyən Rəqabət Məcəlləsi tezliklə müzakirə edilərək, qəbul olunmalıdır”.
Buna cavab olaraq komitə sədri Ziyad Səmədzadə deyib ki, Prezident Administrasiyasının göstərişi ilə bu yaxınlarda xarici təşkilatların nümayəndələri ilə görüşülüb, ölkədə iqtisadi proseslərlə bağlı geniş müzakirələr aparılıb: “Onlar da bizim həyata keçrimək istədiyimiz islahatları təqdir edirlər. Ona görə də ümid edirəm ki, sizin dediyiniz kimi yaxın gələcəkdə Rəqabət Məcəlləsi də parlamentdə gündəliyə salınıb müzakirə oluna bilər”.
Mürtəza
Gununsesi.info
