Nə zərərçəkənin özü, nə də şahidlər ortaya sübut qoya bilib - AZƏR QASIMLININ VƏKİLİ MƏHKƏMƏDƏN ƏDALƏT TƏLƏB EDİR

Onun sözlərinə görə, CM-nin 182-ci maddəsində nəzərdə tutulan cinayətlərin əsas mahiyyəti hədə-qorxu gəlməklə özgənin əmlakını əldə etməkdir: “Amma bir ildən artıq davam edən araşdırmalar nəticəsində biz bu halı təsdiq edən yalnız bir sübutla üz-üzə qaldıq. O da, Qurbanəli Yusibovun ifadələridir.

Vəkilin sözlərinə görə,  Azər Qasımlı yalnız Qurbanəli Yusibovun sözləri üz-üzədir, bu sözlər əsasında həbs olunub və bu sözlər əsasında ittiham olunur: “Üstəlik Qurbanəli Yusibovun bu sözlərini təsdiq edəcək, hər hansı digər sübut da yoxdur. Məsələn, Azər Qasımlının hədə-qorxu gəlməsini göstərən səs yazısı, SMS-lər, sosial şəbəkədə və messencerlər üzərində aparılmış yazışmalar, yazılı faktlar, videosübutlar iş materiallarında yoxdur”.

Vəkil deyir ki, bu faktı, Qurbanəli Yusibovun sözlərini təsdiq edəcək sübut və şahidlərinin olmamasını Azər Qasımlının məhkəmə istintaqı zamanı verdiyi “Səni təhdid etdiyimi nə ilə sübut edə bilərsən?” sualına Qurbanəli Yusifov “sübut və şahidim yoxdur” cavabı ilə də təsdiq etdi: “Telefon vasitəsi ilə hədə-qorxuya gəldikdə isə təbii ki, danışıqları dinləmiş üçüncü şəxs olmadığı üçün bu hədələri eşitmiş və təsdiq edəcək şahidlər yoxdur. Həmçinin bu danışıqların audio yazısını da Qurbanəli Yusibov ibtidai istintaq zamanı təqdim edə bilməyib.

Müdafiə tərəfi ibtidai istintaq yekunlaşdıqda işlə tanış olandan üzü bəri Qurbanəli Yusibovun ifadələrinin mötəbər olmaması, ziddiyyətli olması, digər sübutlarla təkzib edilməsi barədə xeyli dəlillər irəli sürüb.

Qurbanəli Yusibov Azər Qasımlıya zərər vurduğunu və bu zərəri ödəməyə hazır olduğunu sonuncuya göndərdiyi səsli messajlarda da etiraf edir. Bu səs yazılarını diskdə ibtidai istintaqda işlə tanış olduqdan sonra təqdim etmişik, lakin ibtidai istintaq orqanı həmin səs yazılarını obyektiv qiymətləndirmədi. Məhkəmədə bu subutlara baxıldı və diskdə olan səs yazılarının mətni oxundu.

Məhkəmənin gedişində müdafiə tərəfi faktlarla sübut etdi ki, Qurbanəli Yusibov Azər Qasımlıya zərər vurmuş və onun qarşısında ən azından mülki məsuliyyəti yaranmışdı. Əgər Qurbanəli Yusibovun Azər Qasımlının ona etibar etdiyi 20.000 (iyirmi min) ABŞ dolları ilə necə rəftar etdiyi araşdıralarsa, hətta cinayət məsuliyyəti yarana bilər. Belə təqdirdə Qurbanəli Yusibovun bu məsuliyyətlərdən yayınmaqdan ötrü, Azər Qasımlı barəsində yalan ifadələr verməsi üçün ciddi səbəbləri var idi. Məhz bu səbəbdəndir ki, Qurbanəli Yusibov ona Azər Qasımlı tərəfindən hədə-qorxu gəlməsi barədə ilk şikayəti, iddia olunan hədə-qorxunun baş verməsindən dərhal sonra deyil, üstündən bir neçə il keçdikdən sonra, Azər Qasımlının Qurbanəli Yusibova qarşı mülki iddia qaldırmasından və Mingəçevir şəhər məhkəməsi tərəfindən 17 aprel 2024-cü ildə həmin iddianın təmin edilməsindən və tərəflər arasında mülki mübahisə məhkəmələrdə baxılmağa başlandıqdan sonra – 02 avqust 2024-cü ildə yazıb.

Bu səbəbdən Qurbanəli Yusibovun sözlərinin və ifadələrinin mötəbərlik dərəcəsi çox aşağı qiymətləndirilməlidir. Çünki, adamın məsuliyyətdən yayınması üçün yalan ifadə verməsi onun üçün zəruridir.

İttiham tərəfi iddia edir ki, Azər Qasımlı Qurbanəli Yusibova hədə-qorxu gələrək onu Azər Qasımlıya borclu olması və pulu hissə-hissə ödəməsi barədə yalan məzmunlu qəbzə imza etdirib. Qurbanəli Yusibov tərəfindən qəbz 22 yanvar 2022-ci ildə imzalanıb. Təqdim etdiyimiz sübutlardan görünür ki, Qurbanəli Yusibov bu tarixə qədər Azər Qasımlıya zərər vurduğunu qəbul edir, onun zərər çəkməsini istəmədiyini, zərəri hissə-hissə ödəməyə hazır olduğunu bildirir. İstintaqa təqdim olunan faktlar göstərir ki, Qurbanəli Yusibovun yazıb imzaladığı qəbz və həmin qəbzdə ifadə olunanlar iradəsi məcbur etmə nəticəsində yaranmayıb. Digər tərəfdən Azər Qasımlı ilk dəfə 09 dekabr 2024-cü ildə təqsirləndirilən şəxs qismində cəlb edilən zaman ona verilmiş ittihamın məzmununda qeyd edilmişdir ki,

“o, özgənin külli miqdarda əmlakını əldə etmək məqsədi ilə hədə-qorxu ilə tələb etmə, yəni zərərçəkmiş şəxsin və ya onun yaxın qohumlarının şəxsiyyəti üzərində zor göstərmə hədəsi ilə 2022-ci ildən 2023-cü il tarixdək olan müddət ərzində tanıdığı Yusibov Qurbanəli Vidadi oğlundan ona verməli olduğu, həmin dövrə Azərbaycan Respublikası Mərkəzi Bankının müəyyən etdiyi manat məzənnəsi ilə 13.600 manat təşkil edən 8.000 ABŞ dollar pulun əvəzinə həmin dövrə Azərbaycan Respublikası Mərkəzi Bankının müəyyən etdiyi manat məzənnəsi ilə 75.500 manat təşkil edən 45.000 ABŞ dollar pulu ilkin olaraq arvadı Qasımlı Samirə Vahid qızının Bakı şəhəri, Yasamal rayonu, Akim Abbasov küçəsində yerləşən “Yasamal parkı” ilə üz-bəüz olan yaşayış binasında yerləşən ofisində tələb etmişdir”.

Göründüyü kimi istintaq orqanı da qəbul etmişdir ki, Azər Qasımlı Qurbanəli Yusibovun ona verməli olduğu pulu tələb etmişdir.

Hətta məhkəmə istintaqı zamanı Azər Qasımlının “Mən səndən şəxsi pulunu istəmişəmmi?” sualına cavab olaraq Qurbanəli Yusifov birmənalı şəkildə “Yox” cavabını verdi”.