Hazırda sürətlə yoluxan virus infeksiyalarının hər birini qrip kim dəyərləndirmək olmaz. Nəzərə almaq lazımdır ki, qrip kəskin klinik əlamətlərlə keçən və fəsadlaşmaya meyilli olan, çox ağır infeksiyalardan biridir. Bu gün “qrippoz” əlamətlərlə müşahidə edilən viral infeksiyalar isə hər bir ailənin “çağrılmamış” qonağıdır. Demək olar ki, bütün ailələrdə kimsə öskürür, boğazı ağrıyır və “qrippoz” vəziyyətdədir.
Gununsesi.info xəbər verir ki, bunu tibb elmləri doktoru, professor Musa Qəniyev deyib.
“Burada qorxulu heç nə yoxdur. Sadəcə olaraq, bütün virus infeksiyalarda olduğu kimi indi də gigiyenik qaydalara əməl etmək, tibbi maska taxmaq və dincəlmək lazımdır. Belə virus infeksiyaları ilə yoluxmanın kəskin artmasına səbəb ötən iki ildə dünyada, elədə Azərbaycanda tətbiq edilən uzunmüddətli karantin rejimidir. Ümumiyyətlə isə hər kəsin fəsli dəyişikliyə uyğun olaraq, ildə 2-3 dəfə simptomsuz və ya simptomla müşahidə olunan viral infeksiyalara yoluxması normaldır. Bu, təbiətin özünü tənzimləmə qanunudur. Ona görə də infeksiyaların artmasına görə qorxmağa və stres keçirməyə ehtiyac yoxdur. Sadəcə olaraq, müvafiq infeksiyalara qarşı vaxtında peyvənd olunmaq məsləhətdir. Həmçinin hazırda yoluxma sayında artım müşahidə edilən yeni növ koronavirus (COVİD-19) infeksiyası əleyhinə də vaksinasiyadan keçmək vacib şərtlərdəndir”,- professor söyləyib.
Professor bildirib ki, ölkədə müşahidə edilən hazırkı epidemioloji vəziyyət yalnız Omikron ştamı ilə əlaqəli deyil:
“Hazırkı vəziyyət fəsli viral infeksiyaların simbioz yaşamına xidmət edən tənzim mexanizminin pozulmasının nəticəsi kimi meydana çıxıb. Hesab edirəm ki, ölkədəki mövcud epidemioloji vəziyyət qışla yazın fəsli növbələşmə tarixinə qədər davam edəcək. Sadəcə olaraq, vətəndaşlar yalnız COVİD-19-dan deyil, bütün xəstəliklərdən qorunmalıdırlar. Nəzərə almaq lazımdır ki, koronavirusun hazırda geniş yayılmış dominant ştammı Omikrondur. Həmin mutant variantın yoluxduruculuq xüsusiyyəti yüksək, lakin patogenlik və letallığı qat-qat zəifdir. Omikronun yoluxduruculuğunun yüksək olduğunu da nəzərə alaraq vətəndaşlar kütləvi toplaşmalardan mümkün qədər uzaq durmalıdırlar. Onlar gigiyenik qaydalara əməl etməli və tibbi maska taxmalıdırlar”.
Gununsesi.info
