Ombudsman Elmira Süleymanova Avropa Hüquqşünas Tələbələr Assosiasiyası (ELSA) beynəlxalq təşkilatının Azərbaycan nümayəndəliyinin təşəbbüsü ilə Bakı Dövlət Universitetinin, Azərbaycan Respublikasının Prezidenti yanında Dövlət İdarəçilik Akademiyasının, habelə Milli Aviasiya və Dövlət Gömrük Komitəsi akademiyalarının bir qrup tələbəsi ilə görüş keçirib.
Ombudsman mətbuat xidmətindən Gununsesi.info-ya verilən məlumata görə, insan hüquqlarının müdafiəsi və həyata keçirilməsi ilə yanaşı, hüquqi maarifləndirmə, o cümlədən Ombudsman Aparatında tələbələrlə görüşlər, burada onların səmərəli elmi-tədqiqat təcrübəsi keçməsiAzərbaycan Respublikasının İnsan Hüquqları üzrə Müvəkkilinin diqqət yetirdiyi məsələlərdəndir.
Görüş zamanı Müvəkkil tələbələri salamlayaraq, bu il müstəqilliyinin 25 illiyini qeyd etdiyimiz ölkəmizin memarı,12 noyabr tarixində qəbul olunmasının növbəti ildönümünü qeyd edəcəyimiz ilk Konstitusiyamızın müəllifi olan Ümummilli liderimiz Heydər Əliyevin rəhbərliyi ilə respublikamızda hüquqi islahatların həyata keçirildiyini,Konstitusiyamızın üçdə bir hissəsinin insan hüquq və azadlıqlarına həsr olunduğunu, dövlətimizin beynəlxalq konvensiyalara qoşulduğunu bildirmiş, bu islahatların bu gün də Azərbaycan Respublikasının Prezidenti cənab İlhamƏliyev tərəfindən uğurla davam etdirildiyini vurğulayıb.
Müvəkkil ölkəmizdə Ombudsman təsisatının yaranması, mandatı, səlahiyyətləri və insan hüquqları sahəsində çoxşaxəli fəaliyyəti, beynəlxalq və hüquqi maarifləndirmə tədbirləri, habelə təsisatın BMT-nin Beynəlxalq Əlaqələndirmə Komitəsinin (BƏK) “A” statusuna malik olduğu və Paris Prinsiplərinə uyğun, müstəqil fəaliyyət göstərdiyi barədə ətraflı məlumat verib.
Ölkəmizdə bütövlükdə insan hüquqlarının müdafiəsi və təmini üzrə üç mühüm strateji sənəd – İnsan hüquqlarının müdafiəsinə dair ilk Dövlət Proqramı (1998), Azərbaycan Respublikasında İnsan Hüquqlarının Müdafiəsi üzrə ilk Milli Fəaliyyət Planı (2006) və Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində ilk Milli Fəaliyyət Proqramı (2011), milli qanunvericiliyin daha da təkmilləşdirilməsi və hüquq mədəniyyətinin inkişaf etdirilməsi istiqamətində görülmüş işlər diqqətə çatdırılıb.
Qeyd olunub ki, Ombudsmanın təşəbbüsü və bilavasitə iştirakı ilə Milli Fəaliyyət Proqramının icrası, təbliği və tətbiqi vəziyyətinin öyrənilməsi məqsədilə respublikamızın hər bir rayonunda yerli icra hakimiyyəti və hüquq-mühafizə orqanlarının, bələdiyyələrin, qeyri-hökumət təşkilatlarının, yerli icmaların, geniş ictimaiyyətin və KİV nümayəndələrinin iştirakı ilə ictimai dinləmələr keçirilib.
Ombudsman tələbələrə həm nəzəri, həm də praktiki biliklər verərək, insan hüquqlarının mahiyyəti, əsas prinsipləri, beynəlxalq və milli müdafiəsi mexanizmləri, hüquqi maarifləndirmə, elmi-analitik, informasiya təminatı və ictimaiyyətlə əlaqələr, beynəlxalq əlaqələr sahəsində fəaliyyəti, habelə qaçqın və məcburi köçkünlərin, miqrantların, uşaqların, qadınların, ahılların, əlilliyi olan şəxslərin, hərbi qulluqçuların, məhkumların hüquqlarının müdafiəsi, mülki, siyasi, iqtisadi, sosial və mədəni hüquqların həyata keçirilməsi sahəsində gördüyü işlər, İşgəncələrin qarşısının alınması üzrə Milli Preventiv Qrup tərəfindən şəxslərin öz iradəsi ilə tərk edə bilmədiyi yerlərə baxışların həyata keçirilməsi, o cümlədən həmin müəssisələrdə insanların saxlanılma şəraiti, onlarla rəftar, qidalanma vəziyyəti, tibbi xidmətin təşkili ilə bağlı başçəkmələr barədə danışmış, tələbələrin çoxsaylı suallarını cavablandırıb.
E.Süleymanova, həmçinin, gələcək fəaliyyət istiqamətləri və prioritetlər haqqında məlumat vermiş, o cümlədən BMT-nin Dayanıqlı İnkişaf Məqsədləri, beynəlxalq təşkilatlara əməkdaşlıq və digər sahələrdə əlaqələndirilmiş fəaliyyət göstərəcəyini bildirib.
O, tələbələrə hüquq elminin dərinliklərinə yiyələnərək gələcəkdə dövlətimizin inkişafı, insan hüquqlarının təmin olunması istiqamətində çalışmağı tövsiyə etmişdir.
Avropa Hüquqşünas Tələbələr Assosiasiyası (ELSA) beynəlxalq təşkilatının Azərbaycan nümayəndəliyinin təmsilçiləri və tələbələr görüş və onlar üçün yaradılmış şəraitə görə Ombudsmana təşəkkürlərini bildiriblər.
Tələbələrə Ombudsman haqqında Konstitusiya Qanunu, adı çəkilən Milli Fəaliyyət Proqramlarının nüsxələri və Ombudsman haqqında bukletlər təqdim olunub.
Gülnaz Qənbərli
Gununsesi.info
