Ombudsmanın səlahiyyətləri artırılır

Parlament “Azərbaycan Respublikasının İnsan hüquqları üzrə müvəkkili (ombudsman) haqqında” Azərbaycan Respublikasının Konstitusiya Qanununda dəyişiklik edilməsi barədə qanun layihəsini ikinci oxunuşda müzakirəyə çıxarıb.

Gununsesi.info xəbər verir ki, qanun layihəsi haqqında Hüquq siyasəti və dövlət quruculuğu komitəsinin sədri Əli Hüseynli təqdim edib.

HTML tutorial

O, layihənin birinci oxunuşu zamanı çıxış edən həmkarlarına təşəkkür edib, deyib ki, qanun layihəsinin qəbulunun zərurətini hamı qəbul edib. Əli Hüseynli əlavə edib ki, sədri olduğu komitənin müavini və digər üzvləri bəzi məsələlər qaldırıb və təkliflər irəli sürüblər:

“Bunlar əsasən qanun layihəsinin Konstitusiyaya uyğunlaşdırılması ilə bağlı olub və onlar nəzərə alınıb”.

Deputat Qüdrət Həsənquliyev isə bildirib ki, bir neçə təklif verib və onların bəzisi nəzərə alınıb:

“Mən layihədəki 5.3-cü maddə ilə bağlı fikrimi bildirmək istərdim. Qanun layihələri hazırlananda İşçi Qrupunun üzvləri Konstitusiyanın əsas prinsiplərinə diqqət etməlidirlər. Konstitusiyanın 71.3-cü hissəsində 4 halda insan hüquq və azadlıqları qismən və müvəqqəti məhdudlaşdırılması mümkündür. Bunlar fövqəladə hallar, müharibə, hərbi vəziyyət və səfərbərlik zamanı mümkündür. Epidemiya olduğu təqdirdə mütləq fövqəlaədə vəziyyət elan edilməlidir. Bu da konstitusiyanın tələbidir. Bizdə epidemiya oldu, operativ qərargah yaradıldı. Amma bilinmədi ki, kim yaratdı, necə quruldu”.

Deputat Fazil Mustafa qanun layihəsinə səs verəcəyini deyib. Bildirib ki, onun da bəzi iradları nəzərə alınıb:

“Ancaq qanun layihəsinin 12.2.9-cu maddəsində mücərrədləşməni götürməyi təklif edirəm. Burada insan hüquqlarının pozulması ilə bağlı ombudsman dövlət orqanları, bələdiyyədə çalışanları dəvət edərək tədbirlər görə biləcəyi qeyd olunur. Belə mücərrəd funksiyaları səlahiyyəti geniş olmayan ombudsmanın üzərinə qoyulması düzgün deyil”.

Deputat Erkin Qədirli isə deyib ki, Ombudsman institutunun gücləndirilməsi üçün ona qanunvericilik təşəbbüsü verilməlidir. Müzakirələrdən sonra qanun layihəsi səsə qoyularaq qəbul edilib.

Gununsesi.info