Onların cəsarəti çatmır ki, Naxçıvandakı despotik rejimi aşkar formada müdafiə etsin - QÜDRƏT HƏSƏNQULİYEV

  • By admin
  • 08 Dekabr 2022 13:23

Bütöv Azərbaycan Xalq Cəbhəsi Partiyasının sədri, millət vəkili Qüdrət Həsənquliyev  Naxçıvan Muxtar Respublikasında baş verən hadisələrə münasibət bildirənlərə qarşı səslənən tənqidlərə cavab verib.

Qeyd edək ki, bəzi şəxslər Muxtar Respublika rəhbərliyini tənqid edənləri riyakar adlandırıb.

Gununsesi.info-ya açıqlamasında isə Qüdrət Həsənquliyev “Naxçıvanın problemlərindən əvvəllər danışmayıb indi danışanları  riyakarlıqda ittiham edənlərin özləri riyakardır” deyə bildirib.

Onun sözlərinə görə, bu şəxslər Naxçıvandakı mövcud rejimi açıq şəkildə müdafiə edə bilmədikləri üçün tənqid edən adamları aşağılamağa çalışırlar:

“Onların cəsarəti çatmır ki, Naxçıvandakı despotik rejimi aşkar formada müdafiə etsin. Bu yolla despotik rejimin tənqidçilərini aşağılayır, digər insanları həmin rejimi tənqid etməkdən çəkindirmək istəyirlər.

Əvvəla, içi mən qarışıq çoxlu insan Naxçıvanın real durumunu, orda baş verənləri zaman-zaman ölkə rəhbərliyinin diqqətinə müxtəlif formada çatdırmağa çalışıb. İkincisi, o zaman çoxları bu barədə danışmırdı,  ona görə ki, onların açıq mövqeyinin nəyisə dəyişəcəyinə inanmırdılar. Əksinə, fikirləşirdilər ki, cəmiyyətimiz siyasi baxımdan yetkin deyil, vətəndaşlarımızın bir-birinə qarşılıqlı güvəni yoxdur. Bu baxımdan həmvətənlərinin, hüquq mühafizə orqanlarının onları ailə üzvlərini  yerli despotun təqiblərindən qoruya biləcəyinə inanmırdılar. Bakıdan azmı adam həbs olunaraq Naxçıvana aparılmışdı? Başa düşürdülər ki, açıq tənqidlə ailələrini böyük mərhumiyyətlərlə üz-üzə qoya bilərlər. İndi isə görürlər ki, despotun “dişi çəkilib”, həm də bıçaq artıq sümüyə dirənib. Bundan sonra da susmaq ölkəmizin gələcəyini çox qaranlıq edir. Həmin riyakarların məntiqi ilə xalqımız “riyakar” deyildisə,  gərək 1990-cı illərdə  küçələrə axışmayaydı, çünki 60-cı,70-ci illərdə Sovet İttifaqına qarşı açıq formada çıxmamışdılar. Halbuki, xalq hərəkatının fəallarının əksəriyyəti Kommunist Partiyasının üzvləri idi. Bu cür siyasi dələduzlara əhəmiyyət vermək lazım deyil”.

 

Mətləb Yaqublu

Gununsesi.info