Peqov Ermənistanda məyus oldu: Feyk xəbərlərin əsas istehsalçısı İrəvanda nə axtarırdı?

  • By admin
  • 29 Mart 2021 20:24

Qalmaqalları və ikinci Qarabağ savaşı zamanı feyk xəbərləri ilə məşhurlaşan rusiyalı jurnalist Semyon Peqov Ermənistandakı vəziyyətdən məyus olub.

Ermənipərəst mövqeyi ilə tanınan jurnalist (başqa cür ola da bilməz, axı o, Aram Qabrelyanovun “yemi” ilə dolanır) İrəvana səfər edib və burada vətənpərvərlik hisslərinin yüksəlişi, “hələ heç nə itirilməyib” ruhunda etiraz hərəkatı barədə geniş material hazırlamağı planlaşdırıb. Lakin öz istəyinə nail olmadan, şəhəri tərk etməli olub.

“Etiraz hərəkatı barədə aktual xüsusi reportaj hazırlamağı düşünürdük. Axı etirazlar bizim profilimizdir. Nəticədə biz heç nə çəkə bilmədik. Ona görə yox ki, tənbəlik. Ona görə ki, çəkiləcək heç nə yox idi.

Keçmiş və indiki siyasi elitalar əhalinin böyük qismində nifrət hisləri oyadır və bunun dəyişməsinə də heç bir ümid yoxdur”, – deyə Peqov sosial şəbəkələrdə qeyd edib.

O, təkcə Paşinyanın deyil, Sarqsyan və Köçəryanın simasında əvvəlki hakimiyyəti də ittiham edib:

“Əsas və ən cəsarətli müxalifətçi, eks-prezident Robert Köçəryana gəlincə, o heç bir ciddi fəaliyyət göstərmir. Hətta, müsahiblərimin bir çoxu əmindirlər ki, müharibənin nəticələrinə görə məsuliyyətin böyük bir hissəsi məhz onun üzərinə düşür”, – Peqov yazıb.

O, heç də ürəkaçan olmayan bir nəticəyə də gəlib: “İrəvanda gördüyüm mənzərə insanda depressiya yaradır. Ümid edirəm ki, bu, sağalandır”.

Peqov düzgün diaqnoz qoyub. Ermənistan cəmiyyəti “millətin böyüklüyü”, “dənizdən dənizə böyük Ermənistan” və müharibədəki məğlubiyyətdən sonra qisasçılıq kimi ideyalarla xəstələnib. Ancaq onların müəlicə reseptini heç bir halda Sarqsyan, Köçəryan, Peqov, Qabrelyanov və bu kimi şəxslər yazmamalıdır. Çünki məhz onlar cəmiyyyəti, ölkəni və xalqı iflasa gətirən xəstə ideyaların təbliğatçısı olublar.

Arzu edərdik ki, qloballaşmanın hazırki formatında erməni cəmiyyətinin sağalması həmsərhəd ölkələr, ilk növbədə də Türkiyə və Azərbaycanla mehriban qonşuluq münasibətlərinin bərqərar olmasından və iqtisadi əlaqələrin bərpasından keçsin.

Gununsesi.info