ABŞ mətbuatında əks olunan peyk görüntüləri Rusiyanın Finlandiya sərhədi yaxınlığında hərbi infrastrukturunu genişləndirməyə başladığını göstərib.
Gununsesi.info xarici mediaya istinadən xəbər verir ki, Rusiya-Ukrayna müharibəsi üç ildən artıqdır davam edərkən, mətbuatda əks olunan peyk görüntüləri Finlandiya sərhədinə yaxın bir nöqtədə Rusiya hərbi qüvvələrinin artan mövcudluğunu ortaya qoydu.
New York Times (NYT) qəzetinin məlumatına görə, Finlandiya ilə 1340 kilometr sərhədi olan Rusiya Finlandiya sərhədi yaxınlığında bazalarını gücləndirir və bu bölgədə hərbi infrastruktur qurur.
Planet Laboratoriyasının peyk görüntülərində çəkilmiş fotoda çadırlar, döyüş təyyarələri üçün ərazilər və hərbi maşınlar üçün anbarlar əks olunub. NYT-nin xəbərinə görə, bu inkişaf Rusiyanın Ukraynadakı müharibədən sonra baş verəcəklərlə bağlı strategiyasını da ortaya qoya bilər.
NATO rəsmiləri tərəfindən də təsdiqlənən görüntülərdə ərazidəki cərgə çadırlar, hərbi maşınların dayana biləcəyi anbarlar, döyüş təyyarələrinin dayandığı ərazilərdə aparılan abadlıq işləri və əsasən istifadə olunmayan helikopter bazasında tikinti işləri əks olunub.
Qəzetin qiymətləndirməsinə görə, indiyə qədər atılan addımlar daha geniş, daha uzunmüddətli genişlənmənin ilk mərhələlərindən xəbər verir. NATO rəsmilərinin sözlərinə görə, bu görüntülər Ukrayna müharibəsi başlamazdan əvvəl Ukrayna sərhədinə yaxın bölgədə baş vermiş hərbi yerləşdirmələrə bənzəmir.
Hesabata görə, Ukrayna müharibəsində vuruşan Rusiyanın hələ də sərhəddə çox az əsgəri var və finlər israr edirlər ki, onların heç biri hələ böyük təhlükə yaratmır. Digər tərəfdən, NYT-nin qeyd etdiyi kimi, müharibə başlayandan təxminən bir il sonra qonşusu İsveçlə birlikdə NATO-ya daxil olan Finlandiya və Rusiya arasındakı sərhəd, həm də NATO-nun Rusiya ilə ən uzun təmas xəttidir.
Hərbi analitiklərin fikrincə, region “qaynar nöqtəyə” çevrilə bilər, çünki onun böyük hissəsi mübahisəli ərazi olan Arktika Dairəsi daxilində yerləşir. ABŞ və Finlandiya qüvvələri də bu yaxınlarda bölgədə döyüş təlimləri keçirib. Təlimdə “defolt düşmən” Rusiya idi.
Məlumata görə, Finlandiya müdafiə rəsmiləri də bu fikirdədirlər ki, Ukrayna müharibəsinin “intensiv” mərhələsi başa çatarsa, Rusiya minlərlə əsgərini Finlandiya sərhədinə göndərəcək. Digər tərəfdən, finlər hesab edirlər ki, Rusiya öz qüvvələrini hədələyici səviyyəyə çatdırana qədər təxminən beş il çəkəcək.
Finlandiyanın müdafiə kəşfiyyatı direktoru Pekka Turunen deyib: “Söhbət daha yüksək səviyyədə hərbi gücdən gedir”.
Orxan
