“Moskvada hər il keçirilən ənənəvi “Ölməz alay” adlı aksiya zamanı erməni diasporu təxribata əl atıb, Qarabağın qondarma bayrağını qaldırıblar, azərbaycanlılar buna etiraz ediblər, əvəzində keşik çəkən polis və xüsusi təyinatlı polis dəstələri erməniləri mühafizə altına alaraq azərbaycanlıların yürüşdə iştrakını ləngidiblər. Yəni, ermənilər istəklərinə nail olublar”.
Gununsesi.info xəbər verir ki, bunu politoloq Elxan Şahinoğlu deyib.
O, qeyd edib ki, bundan sonra Kreml o ölkələrdən inciyir ki, onunla birgə Böyük Vətən Müharibəsinin yubileyini qeyd etmirlər:
“Rusiyanın təxribatçılara bu cür dəstəyindən sonra belə yürüşlərdə iştiraka ehtiyac varmı? Özümüz Bakıda İkinci Dünya Müharibəsində həlak olan soydaşlarımızın xatirəsini yad edirik, bu kifayətdir, separatçılara dəstək verən ölkənin paradına niyə qatılmalıyıq?
Bir də səfir Polad Bülbüloğlunun nəhayət ki, səsini eşitmək istərdik. Bəzən mənə elə gəlir ki, o Rusiyada Azərbaycanı yox, özünü təmsil edir”.
Politoloqun sözlərinə görə, o, nə Rusiyada az qala qadağan olunan Ümumrusiya Azərbaycanlıların Konqresinin son durumuna aydınlıq gətirir, nə Dövlət Dumasında Xocalı soyqırımının tanınması məqsədilə imzatoplama kampaniyasına dəstək verir, nə də bu gün yürüşdəki təxribatla bağlı rusiyalı diplomatlara etirazını bildirir:
“Polad Bülbüloğlu YUNESCO-da sədr olub bizə nə xeyri dəyəcək? Əslində onu geri çağırmanın vaxtıdır. Moskvada çevik səfirə ehtiyacımız var”.
KAMİL
Gununsesi.info
