Prezidentin Masallı, Biləsuvar və Salyana səfəri - YENİLƏNİB - FOTO

  • By admin
  • 04 Sentyabr 2016 10:24

i3

Azərbaycan Respublikasının Prezidenti İlham Əliyev sentyabrın 3-də Salyana səfəri çərçivəsində Kürsəngi kəndindəki pambıq sahələrinə baxıb.

Gununsesi.info  bildirir ki, dövlətimizin başçısı ölkəmizdə pambıqçılığın zəngin ənənələrinin bərpa edilməsi və bu sahənin əvvəlki şöhrətinin qaytarılması üçün müvafiq tapşırıqlar verib. 2017-ci ildə respublikamızda pambıq istehsalı 300 min tona, hər hektardan məhsuldarlıq isə 30 sentnerə çatdırılmalıdır. Salyan rayonunda da aqrar bölmənin ənənəvi sahələrindən biri olan pambıqçılığın inkişaf etdirilməsi məqsədilə ardıcıl tədbirlər həyata keçirilir.

Prezident İlham Əliyevə məlumat verildi ki, 2016-cı ildə rayonun 16 kəndində 2168 hektar sahədə pambıq əkini aparılıb. Gələn il Salyanda 7 min hektarda pambıq əkilməsi planlaşdırılır.

Pambıqçılarla söhbət edən Prezident İlham ƏLİYEV dedi:

-1970-ci illərdə Azərbaycanda ildə bir milyon ton pambıq yığılırdı və işçilər də razı idi, iş də gedirdi. Pambıqçılar yaxşı pul da qazanırdılar. Ondan sonra yavaş-yavaş azalma başladı. Keçən il cəmi 30 min ton pambıq yığılmışdır. İndi 24 rayonda yeni proqram icra edilir, o cümlədən Salyan rayonunda pambıq sahələri genişləndirilib. 2015-ci ildə Salyanda 400 hektar pambıq sahəsi var idisə, bu gün artıq 2200 hektarda pambıq əkilib. Gələn il, bu, 7 min hektara qalxacaq. Bütün bu sahələr yeni sahələrdir. Şoranlaşmış torpaq idi. Görülən operativ tədbirlər nəticəsində indi bu 120 hektarda pambıq əkilib. Yaxın günlərdə yığım başlanacaq.

İndi dövlət xətti ilə yeni texnikanın da alınması təmin edilir. Biz bu məqsədlər üçün yüz milyonlarla dollar vəsait xərcləyirik ki, bu iş daha geniş vüsət alsın, ölkəmizin inkişafı təmin edilsin və yeni iş yerləri yaradılsın. Çünki pambıq tarlalarında çoxsaylı iş yerləri yaradılır. Hər hektarda orta hesabla iki nəfər işləyir. Gələn il 7 min hektarda ən azı 14 min insan işləyəcək, pul qazanacaq və öz maddi vəziyyətini yaxşılaşdıracaq, dövlətimizə də, ümumi işimizə də töhfə verəcək.

i5

Bu tarlalarda işləyənlərin şəraiti də yaxşı olmalıdır. Burada tarla düşərgəsi də var. Təbii ki, pambıqçılar üçün hər cür şərait yaradılmalıdır, su, yemək təşkil olunmalıdır. 1970-ci illərdə Ulu Öndərin rayonlara səfərlərində mən də onun yanında idim. Tarla düşərgələrində keçirdiyi çoxsaylı görüşlərini xatırlayıram.

Pambıqçı qadın: Mən də xatırlayıram. Bu görüşlərin canlı şahidiyəm.

Prezident İlham Əliyev: Siz o vaxt işləmisiniz?

Pambıqçı qadın: Bəli, 1972-ci illər idi, mən beşinci sinifdə oxuyurdum. Rəhmətlik Ulu Öndərimiz bizim kəndə təşrif buyuranda mən də kolxozçularla bərabər sahədə olmuşam. Onunla əl verib görüşmüşəm. Bunu Allah-Təala mənə nəsib edib. Onda Ulu Öndərimiz mənim başıma sığal çəkib dedi ki, qızım, de görüm böyüyəndə nəçi olacaqsan? Dedim, pambıqçı. “Balama afərin” deyib əlini çiynimə çəkdi. Allah Ulu Öndərimizi qəni-qəni rəhmət etsin. Möhtərəm Prezidentimiz, Siz onun layiqli davamçısısınız, Allah Sizə cansağlığı versin. Siz onun yolunu davam etdirərək pambıqçılığa geniş yer verirsiniz. Bizim Salyan əhalisi iş yeri ilə təmin olunub. Hamı işləyir, qazanır, evinə çörəkpulu aparır. Hamının rifahı yaxşılaşıb, hamı gözəl yaşayır. Sizə minnətdarıq, çox sağ olun. Allah Sizə cansağlığı, uzun ömür versin. Allah övladlarınızı qorusun.

Prezident İlham Əliyev: Çox sağ olun. Pambığın alış qiymətini də artırdıq ki, indi bu tarlalarda işləyənlər daha çox pul qazansınlar. Şərait də yaxşı olmalıdır. Forma da verilib. Gərək sizin bütün iş şəraitiniz yaxşı olsun. Burada bir briqada işləyir?

İcra hakimiyyətinin başçısı Sevindik Hətəmov: Bir neçə briqada işləyir. Hətta, cənab Prezident, bir neçəsinə deyilib ki, iş qurtarandan sonra sizi sanatoriyalara göndərəcəyik.

Prezident İlham Əliyev: Bəli, siz gərək yaxşı işləyənləri fərqləndirəsiniz. Əlavə olaraq yaxşı mükafat verilsin. Gəlin, sizinlə görüşüm. Atamla görüşmüşünüz, mən də sizinlə görüşüm.

Pambıqçılar: Allah Sizə cansağlığı, uzun ömür versin. Çünki biz bir ailəyik. Siz bütün Azərbaycanımızın başçısısınız. Sülh və əmin-amanlıq içərisində yaşayırıq.

Prezident İlham Əliyev: Sağ olun. Sizin hamınıza cansağlığı arzulayıram.

X X X

Sonra xatirə şəkli çəkdirildi.

i2

Daha sonra Prezident İlham Əliyev pambıq tarlasına baxdı və pambıqçılarla bir daha söhbət etdi.

Prezident İlham Əliyev: Formanız da var. Hər şeylə təmin olunmusunuz. Amma o illərdə pambıq daha tez yetişirdi, sentyabrın əvvəlində yığım başlayırdı.

Təsərrüfat rəhbəri: Sizin tapşırığınızdan sonra biz bu torpaqları dövriyyəyə verdik. Bu torpaqlar tamam şoranlaşmışdı, pis vəziyyətdə idi.

Prezident İlham Əliyev tarladan pambıq dərərək dedi: Bu, tarlanın ilk məhsuludur.

Pambıqçı qadınlar: Əliniz yüngül, bərəkətli olsun, inşallah.

Prezident İlham Əliyev: Keyfiyyəti necədir?

Təsərrüfat rəhbəri: Çox yaxşıdır. Liflərin uzunluğu 32,5 millimetrdir. Qabaqlar bizdə digər sortlar var idi – “Ağdaş”, “30-38”, “S-47”. Emal üçün ən sərfəli “ağ qızıl”dır. Bunlar mahlıcdır. Möhtərəm Prezident, mahlıc çıxımı əvvəllər təxminən 26-27 faiz olurdu. Hazırda 40-41 faiz mahlıc çıxımı var. Özü də bunlar üçüncü tipdir, yəni, yumşaqdır.

Prezident İlham Əliyev: Yəni, ixrac üçündür?

Təsərrüfat rəhbəri: Bəli, ixrac üçündür. Bunlar əvvəlkilərdən fərqli olaraq çox keyfiyyətli pambıqdır.

Prezident İlham Əliyev: Bəs, hektardan nə qədər məhsuldarlıq gözlənilir?

Təsərrüfat rəhbəri: 25 sentnerdən yuxarı məhsuldarlıq gözlənilir. Əgər biz əkini vaxtında aparsaydıq hətta 30-35 sentner pambıq götürə bilərdik. Amma biz gecikmişdik. Sizin tapşırığınızdan sonra biz qısa müddətdə gecə-gündüz çalışaraq 18 kilometrdən çox məsafədən suyu buraya gətirmişik, 15 qurğu tikmişik. Duker, akveduk, şülüzlər, körpülər və baş hissədə üç nasos qurmuşuq. Beş kilometr məsafədən 10 kilovoltluq hava elektrik xətti çəkmişik. Yarımstansiya qurmuşuq və suyu onun vasitəsilə ötürürük. Gələn il burada pilot suvarma sistemləri quraşdıracağıq. Bu, məhsuldarlığı 40-45 sentnerə çatdıracaq.

Prezident İlham Əliyev: Bu sistemlər sifariş olunub, tezliklə gətiriləcək. Məhsuldarlıq daha çox artacaq.

Təsərrüfat rəhbəri: Sağ olun. Allah Sizdən razı olsun.

Prezident İlham Əliyev: Sovet vaxtı bu torpaqlar da əkilmişdi?

Təsərrüfat rəhbəri: Xeyr, burada heç vaxt əkin olmayıb. Bura şoran torpaq idi, bərbad vəziyyətə düşmüşdü. Biz qısa müddətdə xeyli iş gördük.

Prezident İlham Əliyev: Burada şoran torpaq çoxdur? Neçə hektardır?

Pambıqçı: Çoxdur, bizim 18 min hektar şoran torpaqlarımız var.

Prezident İlham Əliyev: Əgər o torpaqlarda da iş görülərsə, onları da dövriyyəyə vermək olar? Yolun qarşı tərəfində də eyni vəziyyətdir.

Təsərrüfat rəhbəri: İnşallah, o torpaqları da dövriyyəyə verəcəyik.

Prezident İlham Əliyev: Buna “ağ qızıl” deyirlər.

Pambıqçı: Bəli, möhtərəm Prezident, mən bir söz demək istəyirəm. Biz xalqın, cəmiyyətin içərisində olan adamlarıq. Sizin dönməzliyinizi, fədakarlığınızı, xalqımız, Vətənimiz üçün gördüyünüz işləri hamı qiymətləndirir və Sizə duaçıdır. Biz də dua edirik.

Prezident İlham Əliyev: Sağ olun. Mən çox şadam ki, qısa müddətdə – bir neçə ay ərzində biz bu işləri görə bildik. Yerli icra orqanları yaxşı işlədilər. Prezident Administrasiyası əsas yükü öz üzərinə götürdü və biz bu işləri görə bildik. Baxın, necə də gözəl görünür. Gələn il 7 min hektar olacaq, ondan sonra işlər daha da sürətlə gedəcək. Mən gərək bu pambığı birinci məhsul kimi saxlayım.

Təsərrüfat rəhbəri: Şəxsən Sizin tapşırığınızla becərilmiş torpağın məhsuludur.

Prezident İlham Əliyev: Şəxsən özüm dərmişəm.

Pambıqçılar: Allah Sizə cansağlığı versin. Sizə uzun ömür arzulayırıq. Siz Azərbaycanı əmin-amanlıq şəraitində yaşadırsınız.

Prezident İlham Əliyev: Çox sağ olun. Sizə uğurlar arzulayıram.

18:52

Milli.Az AZƏRTAC-a istinadən bildirir ki, Azərbaycan Respublikasının Prezidenti İlham Əliyev sentyabrın 3-də Salyanda pambıq sahələrinə baxıb.

Dövlətimizin başçısı pambıqçılarla görüşdü, onlarla söhbət etdi.

18:18

Azərbaycan Respublikasının Prezidenti İlham Əliyev sentyabrın 3-də Salyan rayonuna səfəri çərçivəsində Ələt-Astara-İran İslam Respublikası ilə dövlət sərhədi avtomobil yolunun bu rayonun ərazisindən keçən 21,4 kilometrlik (31-ci kilometrdən 54,4 kilometrədək) hissəsinin açılışında iştirak edib.

Milli.Az AZƏRTAC-a istinadən bildirir ki, dövlətimizin başçısına yolun texniki göstəriciləri barədə məlumat verildi.

Prezident İlham Əliyev yolun rəmzi açılışını bildirən lenti kəsdi.

* * *

Sentyabrın 3-də Salyanın “Babazənan” yaşayış massivini şəhərin mərkəzi ilə birləşdirən, Kür çayı üzərində uzunluğu 201 metr, eni 14,5 metr olan yeni körpü istifadəyə verilib.

Milli.Az AZƏRTAC-a istinadən bildirir ki, Azərbaycan Respublikasının Prezidenti İlham Əliyev körpünün açılış mərasimində iştirak edib.

Dövlətimizin başçısına körpünün texniki göstəriciləri barədə məlumat verildi.

Azərbaycan Prezidenti körpünün rəmzi açılışını bildirən lenti kəsdi.

18:03

Milli.Az AZƏRTAC-a istinadən bildirir ki, Azərbaycan Respublikasının Prezidenti İlham Əliyev sentyabrın 3-də Yeni Azərbaycan Partiyası Salyan rayon təşkilatının yeni inzibati binasının açılışında iştirak edib.

Dövlətimizin başçısı binanın rəmzi açılışını bildirən lenti kəsdi və burada yaradılan şəraitlə tanış oldu.

———-

16:05

Milli.Az AZƏRTAC-a istinadən bildirir ki, Azərbaycan Respublikasının Prezidenti İlham Əliyev Salyan rayonuna səfəri çərçivəsində sentyabrın 3-də Tarix-Diyarşünaslıq Muzeyinin açılışında iştirak edib.

Dövlətimizin başçısı rəmzi açılışı bildirən lenti kəsdi və muzeydə yaradılmış şəraitlə tanış oldu.

X X X

Milli.Az AZƏRTAC-a istinadən bildirir ki, Sentyabrın 3-də Salyan şəhərinə Şirvan-Muğan magistral su kəmərindən çəkilmiş yeni içməli su xəttinin açılışı olub.

Azərbaycan Respublikasının Prezidenti İlham Əliyev mərasimdə iştirak edib.

Dövlətimizin başçısı burada rayon ictimaiyyətinin nümayəndələri ilə görüşdü.

Azərbaycan Prezidenti su xəttini işə saldı.

Sonda xatirə şəkli çəkdirildi.

————

15:59

Milli.Az AZƏRTAC-a istinadən bildirir ki, Azərbaycan Respublikasının Prezidenti İlham Əliyev sentyabrın 3-də Biləsuvar rayonuna səfərini başa çatdıraraq Salyan rayonuna gəlib.

Dövlətimizin başçısı əvvəlcə Salyan şəhərinin mərkəzində ulu öndər Heydər Əliyevin abidəsini ziyarət edərək önünə gül dəstəsi qoydu.

Salyan Rayon İcra Hakimiyyətinin başçısı Sevindik Hətəmov abidənin ətrafında və rayonda görülmüş işlər barədə Prezident İlham Əliyevə məlumat verdi.

———–

13:42

Milli.Az AZƏRTAC-a istinadən bildirir ki, sentyabrın 3-də Azərbaycan Respublikasının Prezidenti İlham Əliyev Biləsuvar rayonuna səfəri çərçivəsində uzunluğu 6 kilometr olan Əsgərabad-Muğan-Çaylı avtomobil yolunun yenidənqurma və bərpadan sonra açılışında iştirak edib.

Dövlətimizin başçısına yolun texniki göstəriciləri barədə məlumat verildi.

Sonra Prezident İlham Əliyev yolun rəmzi açılışını bildirən lenti kəsdi.

———-

13:19

Milli.Az AZƏRTAC-a istinadən bildirir ki, Azərbaycan Respublikasının Prezidenti İlham Əliyev sentyabrın 3-də Biləsuvarda əsaslı təmir və yenidənqurmadan sonra 132 çarpayılıq Mərkəzi Rayon Xəstəxanasında həyata keçirilmiş işlərlə tanış olub.

Dövlətimizin başçısına məlumat verildi ki, bu müalicə ocağında ən müasir tibb avadanlığı quraşdırılıb.

Azərbaycan Prezidenti xəstəxana ilə tanışlıqdan sonra tibb ocağının kollektivi və rayon ictimaiyyətinin nümayəndələri ilə görüşdü.

Xəstəxananın kollektivini və rayon ictimaiyyətinin nümayəndələrini salamlayan Prezident İlham ƏLİYEV dedi:

– Biləsuvar Mərkəzi Rayon Xəstəxanasının əsaslı təmirdən sonra açılışı münasibətilə sizi təbrik edirəm. Çox gözəl xəstəxanadır. Bu xəstəxana, bildiyiniz kimi, 1970-ci illərdə tikilmişdir. Təmirə ehtiyacı var idi. Vaxtaşırı cari təmir aparılırdı. Ancaq sonra qərara gəldik ki, əsaslı təmir olunsun. İndi xəstəxana ilə tanış olarkən görürəm ki, hər şey ən yüksək səviyyədədir. Həm avadanlıq, həm təchizat, eyni zamanda, xəstəxananın şəraiti çox yaxşıdır. Bütün palatalar çox səliqəli, abaddır. Bu xəstəxana nümunəvi xəstəxanalardan biri olacaq. Əslində, son vaxtlar Azərbaycanda tikilən, yaxud da ki, təmir olunan bütün tibb ocaqları bu səviyyədədir. Bu, Azərbaycan standartıdır. Çünki Azərbaycan vətəndaşları ən gözəl tibbi xidmətlə təmin olunmalıdırlar.

Eyni zamanda, bu xəstəxana burada çalışan həkimlər üçün iş yeridir. Onların iş yeri indi çox gözəl vəziyyətdədir. Xəstəxananın əvvəlki vəziyyəti sizə bəllidir, bu barədə danışmaq istəmirəm. Əsas odur ki, indi Biləsuvarda da Mərkəzi Rayon Xəstəxanası bütün standartlara cavab verir.

Bu zonada, həmçinin ölkəmizin bütün bölgələrində yeni xəstəxanalar ya tikilib, ya da ki, əsaslı təmir olunub. Son 13 il ərzində 600-dən çox tibb ocağı yenidən qurulub, tikilib. Bu, səhiyyə sistemimizin inkişafı üçün çox böyük uğurdur, böyük nailiyyətdir və nəticədir. Bakı şəhərində isə ən böyük xəstəxanalar tikilib, təmir edilib.

Bu gün səhiyyə sahəsinin maddi-texniki bazasının möhkəmləndirilməsi işi demək olar ki, başa çatır. Bir neçə rayonda işlər davam etdirilir, o cümlədən bu yaxınlarda Masallıda xəstəxana istifadəyə veriləcək. İndi əsas məsələ ondan ibarətdir ki, insanlara keyfiyyətli xidmət, qayğı göstərilsin. Bu istiqamətdə də işlər gedir. Əminəm, yeni müasir avadanlıqla işləyə bilən həkimlər də təcrübə toplayıblar, kurslar keçiblər ki, xəstələrə yaxşı xidmət göstərsinlər.

Sağlamlıq hər bir insan üçün, dövlət üçün çox önəmlidir. İnsan sağlamlığını şərtləndirən bir neçə amil var. Onların arasında əlbəttə ki, tibbi xidmət birinci yerdədir. Bununla bərabər, sağlam həyat tərzi, gözəl ekoloji vəziyyət, fiziki fəallıq, təmiz ərzaq məhsulları da, əlbəttə ki, öz rolunu oynayır. Ancaq tibbi müayinə və müalicə xüsusi yer tutur. Yaxşı bilirsiniz ki, artıq bir neçə ildir Azərbaycanın bütün bölgələrində diaqnostika işləri aparılır, tibbi müayinə proqramı icra edilir. Hər il milyonlarla insan pulsuz müayinədən keçir, onların xəstəlikləri aşkarlanır və sonra müalicə təyin edilir.

Mən son 13 il ərzində açdığım bütün xəstəxanaların tədbirlərində bu məsələyə toxunuram. Bir daha demək istəyirəm ki, hər bir vətəndaş ildə bir dəfə diaqnostikadan keçməlidir, xüsusilə indiki şəraitdə ki, bütün imkanlar var. Qan analizləri, ultrasəs, rentgen. İndi həkimlərin tövsiyəsi ilə hər bir vətəndaş özünə yaxşı baxmalıdır. Bu, ilk növbədə vətəndaşın özünə lazımdır. Digər tərəfdən, Azərbaycan xalqı daha da sağlam olmalıdır. Xüsusilə bizim veteranlarımız, uşaqlarımız, gənc nəsil sağlam olmalıdır. Bütün insanlar sağlam olmalıdır. Bax, bu xəstəxanaların tikintisi bu məqsədi güdür.

Qeyd etdiyim kimi, son illər ərzində 600-dən çox tibb müəssisəsi istismara verilib. Bu məqsədlərə çox böyük dövlət vəsaiti xərclənib. Biz bunu edirik. Çünki sosial sahə həmişə olduğu kimi, prioritet təşkil edir. Bu gün də belədir, sabah da belə olacaq. Çünki biz insanlar üçün çalışırıq. Bizim siyasətimizin mərkəzində Azərbaycan vətəndaşı dayanır.

Bununla bərabər, əlbəttə ki, iqtisadi inkişaf olmasa, bu işləri də görmək mümkün deyil. Bir çox ölkələr, hökumətlər var ki, onlar da istərdilər belə gözəl işləri görsünlər. Sadəcə olaraq, imkanları yoxdur. Bizim də vaxtımız var idi ki, istəyirdik edək, imkanımız yox idi. Biz o imkanı yaratdıq. Bu gün iqtisadi cəhətdən qüdrətli Azərbaycan bu sahələrə də böyük vəsait ayırır. Nəinki bu sahələrə, bütün sahələrə – infrastruktur layihələri, sosial infrastruktur layihələri, məktəb binalarının, idman komplekslərinin tikintisi.

Biz bunu Biləsuvar rayonunun timsalında görə bilərik. Üç il bundan əvvəl Biləsuvarda mənim iştirakımla içməli su layihəsinin açılışını qeyd etdik. İndi şəhər əhalisi 24 saat fasiləsiz təmiz içməli su ilə təmin edilir. Biləsuvar rayonunun qazlaşdırılması prosesi başa çatıb. Bütün məntəqələr qaz təchizatına qoşulubdur. İndi Biləsuvar rayonunun 25 kəndinin hamısında qaz var. Yəni, qazlaşdırma 100 faizdir. Biz hələ ölkə üzrə 100 faiz səviyyəsinə çatmamışıq. Ona yaxınlaşırıq. Biləsuvarda biz bunu artıq görürük. Üç böyük kənd yolu layihəsi icra edilib. Kəndlərin əksəriyyətinə gedən yollar abadlaşıb. Bakı-Astara-İran sərhədi magistral yolu çəkilir, Olimpiya kompleksi, digər müəssisələr.

Əlbəttə ki, kənd təsərrüfatı ilə bağlı böyük işlər görülür, burada zavodlar fəaliyyət göstərir. Bu da çox önəmlidir. Son vaxtlar pambıqçılığa böyük dəstək verilir və bu, əhali tərəfindən yaxşı qarşılanır. 1970-1980-ci illərin əvvəllərində ulu öndər Heydər Əliyevin fəal işi nəticəsində Azərbaycanda pambıqçılıq çox geniş vüsət almışdı. İnsanlar çox böyük maddi imkanlar əldə etmişlər. Əfsuslar olsun ki, sonralar bu sahə yavaş-yavaş tənəzzülə uğradı. İndi biz bunu bərpa edirik. Mənə verilən məlumata görə, bu il Biləsuvar rayonunda altı min hektarda pambıq əkilibdir. Keçən il iki min hektar idi. Sovet vaxtında 14 min hektar əkilirdi. Gələn il isə on min hektar əkiləcək. Biz bunu qısa müddət ərzində görülən tədbirlər nəticəsində əldə edirik və bu, məşğulluq deməkdir. Əgər hər hektarda orta hesabla iki nəfər işləsə, bu, artıq gələn il 20 min insanın işlə təmin olunması deməkdir.

Kənd təsərrüfatının digər sahələri də inkişaf etməlidir. Emal sənayesi – burada artıq bir neçə emal müəssisəsi var. Bu işlər daha da sürətlə getməlidir. İndi sahibkarlığın inkişafı üçün əlavə şərait yaradılır, islahatlar aparılır. Sahibkarlar da buna çox müsbət reaksiya verirlər. İnvestisiya artır, təşviq mexanizmi icra edilir. İxrac potensialımız artır.

Biz bütün bunları etməliyik ki, neftdən asılılığımızı tamamilə aradan götürək. Bu layihələri icra etdikcə əlbəttə ki, bizim daha da çox maliyyə imkanımız olacaq. Biz bu maliyyə imkanlarımızı da sosial layihələrə yönəldəcəyik – xəstəxanaların, məktəblərin, yolların tikintisi, köçkünlərin problemlərinin həlli. Biləsuvar rayonunda minlərlə məcburi köçkün yerləşir. Onların problemləri də həll olunur və həll olunacaq. Beləliklə, ölkəmiz uğurla inkişaf edəcək. Regionlar inkişaf etdikcə ölkə də güclənəcək və biz həmişə ancaq daxili resurslara arxalanmalıyıq.

Biz, ümumiyyətlə, heç bir yerdən yardım almırıq və buna ehtiyac da duymuruq. Ona görə də daxili resursları artırmalıyıq. Azərbaycan dövlətinin siyasəti bundan ibarətdir. Bizim çox böyük potensialımız var. Sadəcə olaraq, biz bu potensialdan 100 faiz istifadə etməliyik. Sənaye, kənd təsərrüfatı, investisiya qoyuluşu, sahibkarlıq, şəffaflıq inkişaf etməlidir.

Biz bu gün Masallıda “ASAN xidmət” Mərkəzinin açılışını qeyd etdik. Bu Mərkəz bu zonaya da xidmət göstərəcək. Gələcəkdə digər rayonlarda da açılacaq. Yəni, hərtərəfli inkişaf budur.

Əminəm ki, Biləsuvar rayonu bundan sonra da uğurla inkişaf edəcək. Rayonda çox gözəl quruculuq, abadlıq işləri görülür. Rayonun siması yaxşılaşır, gözəlləşir. Rayonda mənim köhnə dostlarım da var. Mən onları da salamlayıram. Yadımdadır, 2000-ci ildə mən Lənkərana gedirdim, bu yoldaşı yolda gördüm. Məni bayraqla salamlayırdı. O vaxt bizim olimpiyaçılarımız yaxşı nəticə qazanmışdılar. Maşını saxlatdım, elə o vaxtdan tanış olduq, o vaxtdan da dostluq edirik.

Sakin: Mən Sizinlə fəxr edirəm. Siz Azərbaycanı dirçəltdiniz. Allaha and olsun, Sizin bütün işlərinizlə fəxr edirəm. Təzə su də çəkdirmisiniz, içdim, bir az da cavanlaşdım. Ömrünüz su qədər uzun olsun.

Prezident İlham ƏLİYEV: Çox sağ ol. Sizi bir daha təbrik edirəm.

Həkim Vəsilə Həsənova: Möhtərəm Prezident, bu gün bütün biləsuvarlılar böyük sevinc içindədir. Sizin tapşırığınıza əsasən mərkəzi xəstəxanamız əsaslı təmirdən sonra istifadəyə verilib. Belə gözəl, yüksək səviyyəli, müasir tibbi avadanlıqla təchiz olunmuş səhiyyə ocağı biz biləsuvarlılar üçün böyük töhfədir. Belə bir hədiyyəni bizə bəxş etdiyiniz üçün Sizə əhalimiz və səhiyyə işçilərimiz adından böyük minnətdarlığımızı bildiririk. Çox sağ olun. Var olun, möhtərəm cənab Prezident.

Prezident İlham ƏLİYEV: Sağ olun.

X X X

Sonda xatirə şəkli çəkdirildi.

———-

13:04

Azərbaycan Respublikasının Prezidenti İlham Əliyev sentyabrın 3-də Biləsuvar rayonuna səfərə gəlib.

Milli.Az AZƏRTAC-a istinadən bildirir ki, dövlətimizin başçısı əvvəlcə Biləsuvar şəhərinin mərkəzində ulu öndər Heydər Əliyevin abidəsini ziyarət edərək önünə gül dəstəsi qoydu.

Biləsuvar Rayon İcra Hakimiyyətinin başçısı Mahir Quliyev abidənin ətrafında və rayonda görülmüş işlər barədə Prezident İlham Əliyevə məlumat verdi.

———

12:24

Azərbaycan Respublikasının Prezidenti İlham Əliyev sentyabrın 3-də Masallıya səfəri çərçivəsində Tarix-Diyarşünaslıq Muzeyinin açılışında iştirak edib.

Milli.Az AZƏRTAC-a istinadən bildirir ki, dövlətimizin başçısına məlumat verildi ki, muzeyin inşasına 2014-cü ildə başlanılıb və tikinti işləri 2016-cı ilin iyulunda başa çatdırılıb.

Bildirilib ki, Prezident İlham Əliyevin 2013-cü il 11 sentyabr tarixli Sərəncamı ilə inşaat işlərinin həyata keçirilməsi üçün 2 milyon manat vəsait ayrılıb. Bina üç mərtəbədən ibarətdir. Burada 5 ekspozisiya zalı, fond və iş otaqları, ideoloji mərkəz, rəsm qalereyası fəaliyyət göstərir.