Rusiyanın dövlət başçısı Vladimir Putin prezident seçkilərində səs verib.
Gununsesi.info xəbər verir ki, Kremlin yaydığı məlumata görə, Putin Moskva vilayətindəki iqamətgahında Rusiya prezident seçkilərində uzaqdan elektron səsvermədə iştirak edib.
Rusiyada prezident seçkiləri martın 17-dək davam edəcək. İlk dəfədir ki, ölkədə prezident seçkiləri üç gün ərzində və federal dairələrin demək olar ki, üçdə birində məsafədən elektron səsvermə sistemindən istifadə etməklə keçirilir.
Prezidentliyə 4 namizəd mübarizə aparır: hazırkı prezident Vladimir Putin “Vahid Rusiya” partiyasının dəstəyi ilə müstəqil namizəd olub, Liberal Demokrat Partiyasının sədri Leonid Slutski, Kommunist Partiyasından namizəd Nikolay Xaritonov və Yeni Xalq Partiyasından Vladislav Davankov.
Xarici media yazır ki, 4 müddət ölkə prezidenti olmuş Putinin seçkini qazanacağı dəqiq olsa da, namizədlərdən heç biri 50 faizdən çox səs toplaya bilməsə, aprelin 7-də səsvermənin ikinci turu keçiriləcək.
Seçkidə qalib gələn namizədin mayın 7-də andiçməsi planlaşdırılır.
Yeni seçilən prezident bu vəzifəni 6 il icra edəcək. Seçilmək şansının çox yüksək olduğu hesab edilən Putin yenidən səsvermədə qalib gəlsə, 5-ci dəfə Rusiya prezidenti olacaq.
Gununsesi.info
