İsrail ordusunun döyüş təyyarələrinin müşayiəti ilə işğal altındakı İordan çayının qərb sahilində Cenin şəhərinə təşkil etdiyi hücumda yaralanan fələstinlilərdən biri həyatını itirib, ölənlərin sayı isə 4-ə yüksəlib.
Gununsesi.info-nun məlumatına görə, Fələstin rəsmi televiziyasının verdiyi xəbərdə yaralılardan bəzilərinin vəziyyətinin ağır olduğu bildirilib. Ölənlərin kimliyi ilə bağlı məlumat verilməyib.
Fələstinin rəsmi xəbər agentliyi WAFA-nın yerli mənbələrə istinadən verdiyi məlumata görə, İsrail işğalçı qüvvələri Cenin şəhərinin Burkin, Burkin Vadisi, Əl-Hadef bölgəsinə hücum edib.
Hücumdan əvvəl İsrail qüvvələri bölgədəki bəzi binaların damlarına snayperlər yerləşdirib.
Hücuma müqavimət göstərmək üçün Cenin şəhərinin Makbarat Shuheda bölgəsi ətrafında toplaşan fələstinlilərə İsrail döyüş təyyarələri tərəfindən ən azı iki raket atılıb. Raketli hava hücumu nəticəsində çoxlu sayda insan yaralanıb.
Cenin İbn Sina Xəstəxanasındakı sağlamlıq mənbələri raket hücumu nəticəsində 8 yaralının qəbul edildiyini, bəzilərinin başından xəsarət aldığını və vəziyyətlərinin ağır olduğunu bildirib. Rayonun digər xəstəxanalarında da yaralıların olduğu bildirilib.
Yaralı fələstinliləri xəstəxanaya aparmaq üçün gələn təcili yardım maşınlarının qarşısı İsrail əsgərləri tərəfindən alınıb.
Bölgədəki yerli mənbələrdən verilən məlumata görə, İsrail əsgərləri ilə Fələstin müqavimət qrupları arasında qarşıdurma baş verib. İsrail ordusuna aid bəzi avtomobillər fələstinlilər tərəfindən partlayıcılarla hücuma məruz qalıb.
Məsələ ilə bağlı Əl-Qəssam briqadaları “Cenin şəhərinə basqın edən İsrail əsgərləri ilə qarşıdurmada bəzi əsgərləri yaraladıqlarını” açıqlayıb.
Bildirilib ki, Cenin şəhərinə basqınla eyni vaxtda İsrail qüvvələri şəhərdə elektrik enerjisini kəsib.
İsrail qüvvələrinin İordan çayının qərb sahilindəki qarşıdurmalarda hava qüvvələrinə müraciət etmədiyi çoxdan məlumdur.
Qəzza zolağına intensiv hava zərbələri ilə eyni vaxtda İordan çayının qərb sahilində artan gərginlikdən sonra İsrail ordusu oktyabrın 22-də Cenin şəhərindəki Ənsar məscidinə hava zərbəsi endirib və nəticədə bir nəfər ölüb.
Səid Əhmədli
Gununsesi.info
