Qələbənin 4 günü - Aprel döyüşləri

  • By admin
  • 02 Aprel 2022 15:28

Azərbaycan Ordusunun Aprel döyüşlərində qazandığı şanlı qələbədən 6 il keçir.

2016-cı il aprelin 2-də Ermənistan silahlı qüvvələrinin təxribatlarına cavab olaraq Azərbaycan Ordusu sürətli əks-hücum əməliyyatı ilə düşməni ağır məğlubiyyətə uğradıb, Füzuli, Cəbrayıl və Ağdərə rayonlarının işğal altındakı ərazilərinin 2000 hektardan çox hissəsini azad edib. Həmçinin minlərlə hektar ərazi Azərbaycan Ordusunun tam nəzarətinə keçib.

Müzəffər Ordumuz dördgünlük Aprel döyüşləri ilə 23 ildən sonra xalqımıza qələbə sevinci yaşadıb. Aprel savaşı 44 günlük Vətən Müharibəsinin başlanğıcı kimi qiymətləndirilir.

Gununsesi.info xəbər verir ki , bu barədə modern.az-a danışan hərbi ekspert Üzeyir Cəfərov Aprel döyüşlərinin Azərbaycanın hərb tarixində xüsusi yerinin olduğunu bildirib. Onun sözlərinə görə, Silahlı Qüvvələrimiz cəmi 4 gün ərzində düşmənə layiqli cavab verərək, nəyə qadir olduğunu nümayiş etdirib:

“Aprelin 1-dən 2-nə keçən gecədən başlayaraq ermənilər bizim bütün cəbhəboyu hərbi hissə və yaşayış məntəqələrimizi intensiv atəşə tuturdular. Azərbaycan Ordusu üzərinə düşəni etdi və aprelin 2-dən etibarən düşmən təxribatlarının qarşısını almağa başladı. 2000 hektardan çox ərazi Azərbaycan Ordusu tərəfindən azad edildi. Talış kəndi düşməndən azad olundu. Əsas strateji yüksəkliklər düşməndən təmizləndi. Aprel döyüşlərinin müddəti ilə bağlı hərə bir rəqəm deyir. Cəmi 4 gün ərzində Azərbaycan Ordusu düşmənə sarsıdıcı zərbələr vurdu. Horadiz bölgəsinin təhlükəsizliyini təmin etmək üçün Lələtəpə istiqamətində uğurlu əməliyyat keçirdik. Həmin ərazi də bizim nəzarətimizə keçdi. Düşmən yüzlərlə itki verdi, yaralıların sayı 500-dən çox oldu”.

Ekspert vurğulayıb ki, 4 günlük döyüşdə düşmən sarsıdıcı zərbə alıb və Azərbaycan Ordusunun gücünə bələd olub:

“Prosesə Ermənistana havadarlıq edən Rusiya qoşuldu. Rusiya Federasiyasının siyasi, hərbi rəhbərliyi, Xarici İşlər Nazirliyi, o cümlədən Rusiya Prezidentinin indiki mətbuat katibi Dmirti Peskov Azərbaycandan təkidlə döyüş əməliyyatlarının dayandırılmasını və imkan yaradılmasını xahiş etdilər. Amma biz sonradan gördük ki, onların məqsədi başqa imiş. Aprel döyüşlərindən sonra Rusiyadan Ermənistana xeyli sayda silah-sursat verildi. Bütün bu silah-sursatlar 2020-ci ilin sentyabrında başlayan əməliyyatda heç nəyə yaramadı. 2016-cı ildə ilk dəfə düşmənə siqnallar ötürmüşdük ki, bizim hazırlığımız yetəri səviyyədədir. Amma düşmən bunu dərk etmədi. 44 günlük Vətən Müharibəsində düşmənə layiq olduğu cavabı verərək, onları darmadağın etdik. Bununla da torpaqlarımızı işğaldan azad etməyə nail olduq”.

Xatırladaq ki, 2016-ci ilin aprelində Silahlı Qüvvələrimizin həyata keçirdiyi əks-həmlə əməliyyatının məqsədi Ermənistan silahlı qüvvələrinin təmas xəttindəki yaşayış məntəqələrinə törətdiyi təhlükəni aradan qaldırmaq idi. Belə ki, 2016-cı ilin martından başlayaraq, Ermənistan silahlı qüvvələrinin birləşmələri cəbhəboyu zonadakı yaşayış məntəqələrini daha sıx atəşə tutmağa başlamışdı. Vəziyyəti gərginləşdirmək məqsədilə erməni hərbi birləşmələri artilleriya qurğularından həm döyüş mövqelərimizi, həm də təmas xəttinə yaxın olan yaşayış məntəqələrini atəşə tuturdu. Düşmən aprelin 2-nə keçən gecə bütün mövqelərimizi, eyni zamanda mülki əhalini atəşə tutub. Azərbaycan tərəfindən dərhal adekvat tədbirlərin görülməsi ilə bağlı qərar qəbul edilib və qəti cavab zərbələri endirilib. Düşmən müdafiəsinin ön xəttində və dərinliyində yerləşən koordinatlar müəyyənləşdirilib, Ermənistan ordusunun canlı qüvvəsi və hərbi texnikası məhv edilib.

Aprel hadisələrində cəbhənin ən gərgin istiqaməti Ağdərə-Tərtər-Ağdam və Füzuli istiqaməti olub. Azərbaycan Silahlı Qüvvələrinin bölmələri aprelin əvvəlində qısa müddətdə düşmənin öndə və dərinlikdə cəmləşən qüvvələrini müəyyənləşdirib və qəti zərbələrlə sıradan çıxarıb. Uğurlu əməliyyatlar nəticəsində Naftalan şəhərinə təhlükə yaradacaq Talış kəndi istiqamətindəki yüksəkliklər işğalçılardan təmizlənib. Həmçinin Horadiz şəhərinin düşmən təhlükəsindən qorunması məqsədilə Füzuli rayonu istiqamətində yerləşən, geniş ərazini nəzarətdə saxlamaq imkanı verən olduqca strateji əhəmiyyətli Lələtəpə yüksəkliyi azad edilib.

Ordumuzun qəti zərbələri nəticəsində düşmənin 30-dək tankı, 25-dən çox artilleriya qurğusu və digər zirehli texnikası məhv edilib, 320 hərbçisi öldürülüb, 500-dən artıq döyüşçüsü yaralanıb. Ağdərə-Madagiz istiqamətində yolların nəzarətdə saxlanılması təmin edilib.

Aprel döyüşlərində illərlə yaradılan “məğlubedilməz erməni ordusu” mifi dağıdılıb və erməni xalqı işğalçılıq siyasətinin iflasa uğradığını dərk edib. Aprel qələbəsi əsgərlərimizin döyüş ruhunun, ordu ilə xalqın birliyinin təcəssümü olub.

Uğurlu aprel əməliyyatından sonra Ermənistanın işğalçılıq siyasəti danılmaz faktlarla yenidən təsdiqlənib. Belə ki, döyüşlərdə ölənlərin əksəriyyətinin Ermənistan hərbi qulluqçularının olması, onların Ermənistan hökuməti tərəfindən mükafatlandırılması, yaralıların böyük bir hissəsinin Ermənistanın tibb müəssisələrində müalicə alması və dövlət tərəfindən “separatçı cəlladların” könüllü adı altında yenidən Qarabağa göndərilərək erməni ordusunun qoyub qaçdığı səngərlərə doldurulması cəhdi və digər faktlar buna əyani sübutdur.

Ermənistan ordusunun təmas xəttində törətdikləri təxribatlar zamanı dinc əhali arasında da həlak olan və yaralananlar olub, yaşayış məntəqələrimizə böyük ziyan dəyib.

Azərbaycan Respublikasının ərazi bütövlüyünün qorunub saxlanması, erməni işğalçılarının 2016-cı il aprelin 2-dən 5-dək qoşunların təmas xəttində törətdikləri silahlı təxribatların qarşısının alınması və düşmənin dinc əhaliyə hücumlarının dəf edilməsi zamanı göstərdikləri qəhrəmanlıq və igidliyə görə Azərbaycan hərbçilərinin xüsusi fərqlənən bir qrupu 2016-cı il aprelin 19-da Azərbaycan Respublikası Prezidentinin müvafiq sərəncamları ilə yüksək fəxri ada layiq görülüb, orden və medallarla təltif edilib.

Vətən qarşısındakı xidmətlərinə görə təltif edilənlər arasında “Azərbaycanın Milli Qəhrəmanı” fəxri adına, “Azərbaycan Bayrağı” və “Vətənə xidmətə görə” ordenlərinə, “Vətən uğrunda”, “İgidliyə görə” və “Hərbi xidmətlərə görə” medallarına layiq görülənlər var.

Uğurlu Aprel döyüşlərinin məntiqi davam olaraq, Azərbaycan Ordusu 2020-ci il sentyabrın 27-dən başlayaraq 44 gün ərzində torpaqlarımızı işğaldan azad edib, Ermənistan kapitulyasiya aktına imza artmaq məcburiyyətində qalıb.

Gununsesi.info