Regionlara dotasiyaların azaldılması mədəniyyət və təhsil sektorlarının mərkəzləşdirilmiş qaydada idarə edilməsi ilə bağlıdır.
Gununsesi.info xəbər verir ki, bunu maliyyə naziri Samir Şərifov Milli Məclisin Hüquq siyasəti və dövlət quruculuğu, İnsan hüquqları, Gənclər və idman komitəsi, Regional məsələlər və Beynəlxalq münasibətlər və parlamentlərarası əlaqələr komitələrinin birgə iclasında 2017-ci il üzrə dövlət büdcəsi layihəsinin müzakirəsi zamanı deyib.
Onun sözlərinə görə, regional idarələr yaradılır və bu idarələr mərkəzləşdirilmiş qaydada maliyyələşdirilir: “Həmin qurumlar hesab edir ki, regional idarələrin yaradılması büdcə vəsaitlərinin xərclənməsin səmərəliliyi artıracaq. Məhz bu səbəbdən də bu zaman struktur dəyişikliklərinin yaranmasına zərurət yaranıb”.
Bələdiyyələrlə bağlı qaldırılan problemlərə toxunan nazir deyib ki, bələdiyyələrlə bağlı qaldırılan məsələ yeni deyil: “Qanunvericilikdə bələdiyyələrə subvensiya verilməsi məsələsi öz əksini tapıb. Amma bu o demək deyil ki, bələdiyyələrə subvensiya verilməlidir. Maliyyə Nazirliyinin subvensiya verilməsi ilə bağlı səlahiyyəti çatmır. Bunun üçün hansısa mexanizm olmalıdır. Bu mexanizm olandan sonra büdcədə müəyyən vəsait proqnozlaşdırıla bilər”. Nazir bələdiyyələrə kifayət qədər maliyyə vəsaitinin ayrılmaması məsələsinə də toxunub: “Dövlətin bələdiyyələrə maliyyə vəsaitlərinin ayrılması ilə bağlı birbaşa öhdəliyi yoxdur. Buna baxmayaraq, dövlət tərəfindən bu istiqamətdə vəsait ayrılır. Bələdiyyələr müstəqil gəlir imkanlarına malikdir. Düzdür, iri şəhərlərdə gəlir imkanları daha yüksəkdir, bəzi rayonlarda daha azdır”.
S. Şərifov əlavə edib ki, rayonlara ayrılan dotasiyaların bölünməsi məsələsinə baxıla bilər.
Mürtəza
Gununsesi.info
