“Rusiyanın Kiyev ətrafında fəallığın azalması ilə bağlı bəyanatları və bəzi rus bölmələrinin bu ərazilərdən çıxarılması ilə bağlı xəbərlər Kremlin regionda təşəbbüsün itirilməsini etiraf etdiyindən xəbər verə bilər”.
Gununsesi.info xəbər verir ki, bu barədə Böyük Britaniya kəşfiyyatı məlumat yayıb.
Britaniya kəşfiyyatının hesabatında qeyd edildiyi kimi, Rusiyanın dəfələrlə uğursuzluqları və Ukrayna qüvvələrinin uğurlu əks-hücumları, demək olar ki, Rusiyanın Kiyevi mühasirəyə almaq məqsədinə çatmadığı anlamına gəlir.
“Çox güman ki, Rusiya şərqdəki Donetsk və Luqansk bölgələrinə hücumu üçün şimaldan döyüş qüvvələri cəlb etməyə çalışacaq”, – Britaniya kəşfiyyatı belə proqnozlaşdırır.
“Rusiyanın Donetsk və Luqanskdakı hücumlara diqqət yetirməsi, görünür, onun birdən çox əhəmiyyətli hücum xəttini var gücü ilə saxlamağa çalışmasının susqun etirafıdır. Böyük itki verən Rusiya bölmələri ehtiyatları yenidən təşkil etmək və artırmaq üçün Belarus və Rusiyaya qayıtmağa məcbur olublar. Bu fəaliyyət Rusiyanın onsuz da gərgin vəziyyətdə olan logistikasına əlavə təzyiq göstərir və Rusiyanın Ukraynadakı ön bölmələrini yenidən təşkil etməkdə hansı çətinliklərlə üzləşdiyini nümayiş etdirir. Rusiya, çox güman ki, məhdud yerüstü manevr imkanlarını kütləvi artilleriya və raket zərbələri ilə kompensasiya etməyə davam edəcək” – məlumatda deyilir.
Ukrayna Silahlı Qüvvələrinin Baş Qərargahı Rusiya qoşunlarının “geri çəkilməsinin” ehtimal olunan hədəfini açıqlamışdı. Ukrayna Silahlı Qüvvələrinin rəhbərliyi bildirir ki, ruslar ayrı-ayrı bölmələri rotasiya etməklə Kiyevi mühasirəyə almaq planından imtina etdiyi barədə yalan illüziya yaratmaq istəyir.
ABŞ Müdafiə Nazirliyi xəbərdarlıq edib ki, hazırda iddia edilən Rusiya qoşunlarının bir hissəsinin Kiyev və Çerniqov istiqamətlərindən çıxarılması rus qüvvələrinin yeni zərbə üçün yenidən qruplaşmasından xəbər verə bilər.
Bundan əvvəl Vladimir Putinin köməkçisi Vladimir Medinski Kiyev və Çerniqov istiqamətlərində kontingentin ixtisar edildiyini açıqlamışdı. Rusiya Federasiyasının Müdafiə Nazirliyi “xüsusi əməliyyat”ın “birinci mərhələsi”nin başa çatdığını və əsas hədəfin Donbas olduğunu bildirib.
Gununsesi.info
