“Rusiya bölgədə güclü Azərbaycanın olmasında maraqlıdır. Moskva onunla müttəfiq olan güclü Azərbaycan vasitəsilə bölgədə öz siyasətini həyata keçirmək istəyir.Ona görə də indiki mərhələdə Rusiyanın Ermənistanla yaratdığı birgə hərbi qruplar Azərbaycanın ziyanına deyil”.
Bu fikri Gununsesi.info-ya açıqlamasında Cənubi Politoloqlar Klubunun rəhbəri İlqar Vəlizadə deyib.
Onun sözlərinə görə, onsuz da bu günə kimi Ermənistan ordusu faktiki olaraq Rusiyanın nəzarətində idi. “Odur ki, Putinin Ermənistan və Rusiyanın birgə hərbi qruplarının yaradılması ilə bağlı imzaladığı sərəncam növbəti addımdır. Çünki bunadək Ermənstanın hava məkanının müdafiəsi sistemi Rusiyanın idarəçiliyinə verilib. Ancaq Rusiya prezidentini bu sərəncamı ilə Ermənistanın Silahlı Qüvvələri şərti müstəqilliyini də itirmiş oldu”- deyə, politoloq vurğulayıb.
Bununla belə politoloq hesab edir ki, Putinin bu sərəncamı Azərbaycan üçün ismarıcdır. “Moskva bununla Azərbaycana ismarıc vermək istəyir ki, hərbi tədarük görəndə burada gücün kimin əlində olduğunu bilməlidir. Əslində Azərbaycan bunu bilir”- deyə, politoloq vurğulayıb.
Politoloqun fikrincə, bu gün rəsmi Bakının əsas məsələsi ondan ibarət olmalıdır ki, Dağlıq Qarabağ münaqişəsinin həllində bu gücləri neytrallaşdırsın. “Aprel hadisələri göstərdi ki, düzgün siyasət nəticəsində Rusiyanı Qarabağ münaqişəsinin güc yolu ilə həllində yetərincə neytral saxlamaq olar. Bu qüvvləri neytral vəziyyətdə saxlamaq üçün bizdə yetərincə rıçaqlar var. Aprel döyüşləri bunu sübut etdi. Yəni, Rusiyanı proseslərdən kənarda saxlamaqla, ermənilərin cəbhə xəttini asanalıqla yarmaq mümkündür. Ona görə növbəti mərhələdə də Rusiyanı proseslərdən neytral saxlamaq üçün işlər görülməlidir. Bunun üçün imkanlardan maksimum yararlanmaq lazımdır və bu imkanlar bizdə var”- deyə, o, bildirib.
Politoloq onu da deyib ki, Rusiya Cənubi Qafqazda təhlükəsizlik sisteminin pozulmasında maraqlı deyil. “Çünki bunun fəsadları çox pis ola bilər. Bölgədə xaos yaranarsa, o zaman Suriyadakı vəziyyətə yarana bilər. Odur ki, Moskvaya bölgədə güclü Azəebaycan və Azərbaycan vasitəsi ilə öz siysətini həyata keçirməkdə maraqlıdır”-deyə, o bildirib.
Mürtəza
Gununsesi.info
