Oktyabrın 24-də Bakı Ağır Cinayətlər Məhkəməsində hakim Əlövsət Abbasovun sədrliyi ilə Taleh Bağırov, Fuad Qəhrəmanlı və digərlərinin cinayət işi üzrə məhkəmə prosesi davam etdirilib.
Gununsesi.info-nun xəbərinə görə, hakim Əlövsət Abbasovun sədrliyi ilə keçirilən prosesdə Sabunçu rayon Polis İdarəsinin əməkdaşı Fərid Səlimov ifadə verib. O deyib ki, ötən il noyabrın 5-də futbol tədbirində olan zaman həyəcan siqnalı verildiyindən idarəyə gəliblər və orada bir qrup şəxsin yığışdığının, binaya tərəf daş atmalarnın şahidi olub. Hadisə zamanı xəsarət almayıb.
Sabunçu rayon Polis İdarəsinin əməkdaşı Samir Əzimov da şahid qismində dindirilib. Vəkillər onların şahidlik statusuna xitam verilməsini istəyiblər. Hakim vəsatəti baxılmamış saxlayıb.
Günün ikinci yarısı isə prosesin davam etdirilməsi baş tutmayıb. Buna səbəb şahidlərin hakim Əlövsət Abbasovun sədrliyi ilə keçirilən prosesə gəlməməsi olub. Növbəti iclas oktyabrın 26-dək təxirə salınıb. Hakim bildirib ki, şahidlərin barəsində məcburi gətirilməsinə qərar verilib və onların prosesdə iştirakı təmin ediləcək.
Qeyd edək ki, T. Bağırov Cinayət Məcəlləsinin 120-ci (qəsdən adam öldürmə) maddəsinin 120.2.1, 120.2.3, 120.2.4, 120.2.7, 120.2.12, 29,120-ci (qəsdən adam öldürməyə cəhd) maddəsinin 29, 120. 2.1, 29,120.2.3, 29, 120.2.4, 29,120.2.7, 29, 120. 2. 12, 228.3-cü (qanunsuz olaraq odlu silah əldə etmə), 228.4-cü (qanunsuz olaraq silah gəzdirmə) və digər maddələri ilə ittiham olunur. Ötən il noyabrın 26-da hüquq-mühafizə orqanlarının əməkdaşlarının Bakının Nardaran qəsəbəsində keçirdikləri xüsusi əməliyyat zamanı T. Bağırov da daxil olmaqla 60-dan çox şəxs saxlanılıb. Həmin şəxslərdən bir neçəsinin cinayət işi digərlərindən ayrılaraq Sabunçu rayon Məhkəməsinə göndərilib, barələrində müvafiq hökmlər çıxarılıb.
AXCP sədrinin müavini F. Qəhrəmanlı isə ötən il dekabrın 8-də həbs edilib. O, Cinayət Məcəlləsinin 281-ci (dövlət əleyhinə açıq çağırışlar), 283-cü ( milli, irqi, sosial və ya dini nifrət və düşmənçiliyin salınması) və 220.2-ci (hakimiyyət nümayəndəsinin qanuni tələblərinə fəal şəkildə tabe olmamağa və kütləvi iğtişaşlara, habelə vətəndaşlara qarşı zorakılıq etməyə çağırışlar etmə) maddələri ilə ittiham olunur.
Gülnaz Qənbərli
Gununsesi.info
