2000-2015-ci illər aralığında 2432 jurnalist peşə fəaliyyətinə görə təqib edilib, qondarma ittihamlarla həbsə salınıb.
Gununsesi.info xəbər verir ki, İstanbulda Beynəlxalq Jurnalistlər Federasiyasının (BJF) təşəbbüsü ilə “Jurnalistlərin təhlükə anında təşkilatlanması” mövzusunda konfrans keçirilib.
Bu barədə məlumat verən Jurnalistlərin Həmkarlar İttifaqı (JuHİ) sədri Müşfiq Ələsgərli bildirib ki, toplantıda BJF-nin Şərqi Avropa məkanında fəaliyyət göstərən yerli üzv təşkilatları, jurnalist birlikləri iştirak ediblər.
Türkiyə Qəzetəcilər Sendikasının ev sahibliyi ilə baş tutan konfransa Azərbaycandan BJF-nin yerli üzv təşkilatı qismində Jurnalistlərin Həmkarlar İttifaqı (JuHİ) qatılıb.
M. Ələsgərli bildirib ki, toplantıda jurnalistlərin son illərdə rastlaşdıqları qlobal problemlər müzakirəyə çıxarılıb: “BJF-nin hesablamalarına görə, 1990-cı ildən 2015-ci ilə qədər olan müddətdə dünyada 2385 jurnalist peşə fəaliyyətinə görə həyatını itirib. Eyni zamanda, 2000-2015-ci illər aralığında 2432 jurnalist peşə fəaliyyətinə görə təqib edilib, qondarma ittihamlarla həbsə salınıb. İş yerini itirən, xəsarət alan, hədələnən jurnalistlərin sayı isə 10.000 nəfəri ötüb”.
BJF hesab edir ki, yaranmış durum jurnalistlərin ciddi şəkildə təşkilatlanmasını, təqibə, təzyiqə məruz qalan jurnalistlərlə beynəlxalq həmrəylik kampaniyalarının keçirilməsini zəruri edir:
“Bu yöndə effektiv vasitələrdən biri kimi, yerli jurnalist ittifaqlarının imkanlarının artırılması üzərində dayanılır”.
M.Ələsgərli bildirib ki, konfransın müzakirə etdiyi əsas mövzu da jurnalist ittifaqlarının bacarıqlarının artırılması vasitələri olub.
Türkiyədə 15 iyul dövlət çevrilişinə cəhd aksiyasından sonra yaranmış durum, medianın vəziyyəti də müzakirəyə çıxarılıb.
Konfrans iştirakçıları fəaliyyətini dayandırmış “Cümhuriyyət” qəzetinin redaksiyasına gedərək, Türkiyədə son hadisələrlə bağlı həbs edilmiş jurnalistlərlə bağlı dinləmələr keçiriblər.
Mürtəza
Gununsesi.info
