Tanınmış publisist-jurnalist, hazırda 1905.az saytının rəhbəri Fuad Babayevin atası AMEA-nın müxbir üzvü, tarix elmləri doktoru, professor İlyas Babayev bu gün dünyasını dəyişib.
Gununsesi.info xəbər verir ki, İlyas Atababa oğlu Babayev 1935-ci ilin martın 23-də Quba rayonunun Xanagah kəndində anadan olub.
1958-ci ildə Azərbaycan Dövlət Universitetini (indiki BDU) fərqlənmə diplomu ilə bitirən İlyas Babayev Azərbaycan Elmlər Akademiyasının Tarix İnstitutunda işə qəbul olur. İlyas Babayev Qafqaz Albaniyası tarixinin və mədəniyyətinin tədqiq edib. İlyas Babayev 1965-ci ildə “Azərbaycanın antik və orta əsrlər dövrü qliptika abidələri” mövzusunda namizədlik dissertasiyasını,1983-cü ildə doktorluq dissertasiyasını müdafiə edib.
İlyas Babayev 1987-ci ildən AMEA Arxeologiya və Etnoqrafiya İnstitutu antik dövr arxeologiyası şöbəsinin müdiri olub.
İlyas Babayev ali və orta məktəb dərsliklərinin, çoxcildlik “Azərbaycan tarixinin” I-II cildlərinin, “Azərbaycan numizmatikası”nın I cildinin, çoxcildlik “Azərbaycan Ensiklopediyası”nın, “Naxçıvan Ensiklopediyası”nın müəlliflərindən biridir.
İ. Babayev 2007-ci ildə AMEA-nın müxbir üzvü seçilib.
Allah rəhmət eləsin! Ruhu şad, məkanı cənnət olsun!
Gununsesi.info
