İran və Azərbaycan yanvarın 29-da hücumdan sonra fəaliyyətini dayandıran Azərbaycanın Tehrandakı səfirliyinin işinin bərpasını tezliklə müzakirə etməyi planlaşdırır.
Gununsesi.info xəbər verir ki, bu açıqlama ilə İran Xarici İşlər Nazirliyinin rəsmi nümayəndəsi Naser Kənani Çafi çıxış edib.
“Azərbaycan rəsmilərinin İrana səfəri ilə bağlı planlar koordinasiya mərhələsindədir və mən sizə hələ dəqiq tarixi deyə bilmərəm. Lakin sizi əmin edirəm ki, bizim gündəliyimizdə azərbaycanlıların işinin bərpası və Cənubi Qafqazdakı hadisələr kimi ciddi məsələlər var” – “Fars” agentliyi onun sözlərini sitat gətirir: “Azərbaycan diplomatlarının Tehrana qayıtması yaxşı əlamət olardı və biz ümid edirik ki, tezliklə bunun baş verdiyini görə biləcəyik”.
Bakı ilə Tehran arasında münasibətlər 2023-cü ilin yanvarında Azərbaycanın İrandakı səfirliyinə silahlı basqın nəticəsində diplomatik missiyanın mühafizə rəisinin şəhid olması və onun iki həmkarının yaralanmasından sonra pisləşib. Hadisədən sonra Azərbaycan səfirliyi diplomatik fəaliyyətini dayandırıb, əməkdaşlarının əksəriyyəti və onların ailə üzvləri Azərbaycana təxliyə edilib. Diplomatik nümayəndəlikdə səfirliyin inzibati binasını və əmlakını qoruyan, lakin diplomatik fəaliyyət göstərməyən cəmi beş nəfər qalıb.
Bazar ertəsi Azərbaycanın dövlət televiziya kanalı AzTV bildirib ki, Azərbaycanın Tehrandakı səfirliyinə silahlı basqın edən cinayətkar İran Ali Məhkəməsi tərəfindən edam cəzasına məhkum edilib. Tehran hələlik bu məlumatı şərh etməyib.
Səid Əhmədli
Gununsesi.info
