Milli Məclis (MM) sədrinin müavini Bahar Muradova Avropa Şurası Parlament Assambleyasının Monitorinq Komitəsinin nümayəndə heyəti ilə görüb.
Gununsesi.info xəbər verir ki, görüşdə qurumun Azərbaycan üzrə həmməruzəçiləri Sezar Florin Preda və Stefan Şennak, Monitorinq Komitəsinin katibi xanım Delfin Freyman, Milli Məclisin deputatı Vüsal Hüseynov iştirak ediblər.
B. Muradova öncə Yeni il təbriklərini çatdırıb, 2017-ci ildə bütün qitələrdə əmin-amanlıq və sülh olmasını arzulayıb. Sonra Azərbaycanla AŞPA arasındakı əməkdaşlıq əlaqələrindən söz açaraq qeyd ebdi ki, Azərbaycan Avropa Şurasının bərabərhüquqlu üzvü kimi hər zaman öz öhdəliklərinə məsuliyyətlə yanaşıb:
“Son vaxtlar hər iki tərəf mövcud əməkdaşlığın yeni mərhələyə qədəm qoyduğunu deyir”.
Vitse-spiker bildirib ki, əlaqələrimizin müsbət məcrada inkişafında həmməruzəçilər mühüm rol oynayır.
Yola saldığımız 2016-cı ildə ölkəmizdə və dünyada gedən siyasi-iqtisadi proseslərə diqqət yönəldən B. Muradova Azərbaycanda həyata keçirilmiş islahatları önə çəkdi, bir sıra məsələlərin tənzimlənməsində referendumun böyük rol oynadığını vurğulayıb.
S. Şennak isə bildirib ki, bu günlərdə Azərbaycan üzrə AŞPA Monitorinq Komitəsinin həmməruzəçisi vəzifəsinə təyin olunmalarının bir ili tamam olur. Ona görə də, cənab Sezar Florin Preda ilə birgə bu ilki fəaliyyətlərinə Azərbaycandan başlamaq qərarına gəliblər.
Eyni zamanda, MM-in Avropa Şurası Parlament Assambleyasındakı (AŞPA) nümayəndə heyətinin üzvləri də həmməruzəçilərlə görüşüblər. Beynəlxalq münasibətlər və parlamentlərarası əlaqələr komitəsinin sədri, AŞPA-dakı nümayəndə heyətinin rəhbəri Səməd Seyidov qeyd edib ki, Türkiyədə və dünyada terror aktlarının intensiv hal alması hər kəsi narahat edir:
“Yeni – 2017-ci ilin demokratiya, insan hüquqlarının aliliyi, vətəndaş cəmiyyətinin inkişafı, terrorizmlə mübarizə, əmin-amanlığın bərqərar olması baxımından həm ümumi evimiz olan Avropada, həm də dünyada sülhlə dolu, uğurlu bir il olacağına, təhlükəsizlik və sabitliyə gözəl töhfələr verəcəyinə ümidvarıq”.
Qonaqlara Dağlıq Qarabağ münaqişəsindəki mövcud durumdan söz açan Seyidov bildirib ki, Ermənistan dayanmadan işğal altında olan Azərbaycan ərazilərində qeyri-qanuni məskunlaşma aparır:
“İşğalçı dövlət BMT-nin və digər beynəlxalq qurumların konkret olaraq bununla bağlı qətnamələrinə məhəl qoymur, hələ də başqa ölkələrdən gələn vətəndaşları orada yerləşdirməyə davam edir. Son günlər erməni silahlı qüvvələri tərəfindən sərhədboyu rayonlarda dalbadal baş verən təxribatlar zamanı şəhid olan Azərbaycan əsgərinin cəsədi iki həftədən artıqdır bizə qaytarılmır. Bu da Cenevrə konvensiyasının prinsiplərinə ziddir”.
S. Şennak da öz növbəsində Avropa Şurasına üzv olan iki dövlət – Azərbaycanla Ermənistan arasında yaşanan bu münaqişədən dərin narahatlığını ifadə edib. Dağlıq Qarabağ münaqişəsində obyektivliyin qorunmasının onların fəaliyyətində önəmli prinsip olduğunu, hesabatlarında əksini tapan məqamların dürüstlüyünü səylə qoruduqlarını bildirib.
Gununsesi.info
