Almaniya hökuməti sabah xüsusilə türkləri narahat edən sürətli və ikili vətəndaşlıqla bağlı qərara səs verəcək. Qanun layihəsi olduğu kimi, qəbul olunarsa, milyonlarla türk çox tez müddətdə Almaniya vətəndaşı ola biləcək.
Gununsesi.info xəbər verir ki, Almaniya Daxili İşlər Nazirliyi tərəfindən hazırlanan və sürətli və ikili vətəndaşlığı nəzərdə tutan Yeni Vətəndaşlıq Qanunu (Gesetzentwurf zur Moderniesierung des Staatsangehörigketisrechts) əvvəlcədən elan edildiyi kimi bu gün deyil, sabah müzakirə ediləcək.
Nazirlikdən bildirilib ki, layihə ilə bağlı ümumilikdə 40 dəqiqə çıxış olacaq, daha sonra səsvermə başlayacaq.
Qanun layihəsində nəzərdə tutulub ki, yaxşı uyğunlaşan şəxslər üç il ərzində, ölkədə yardıma ehtiyacı olmadan işləyən və alman dilini bilənlər isə 5 il ərzində Almaniya vətəndaşlığını ala bilərlər. Hər kəs üçün ikili vətəndaşlığa yol açılacaq.
Ana müxalifətdəki Xristian Demokrat Partiyası da “Almaniya vətəndaşlığının dəyərini qoruyun” adlı təklifinə səs vermək istəyir və vətəndaşlıq qanununa edilən dəyişikliyin ləğv edilməsini tələb edir.
Ancaq çoxluq iqtidar partiyaları, SPD-Yaşıllar və Liberallarda olduğu üçün bu tələbin parlamentdən keçməsi gözlənilmir.
İslahatla əvvəllər 8 il olan vətəndaşlığa qəbul üçün gözləmə müddəti 5 ilə endiriləcək. Xüsusi hallarda və uyğunluq sübut edildikdə, müddət 3 ilə qədər azaldıla bilər.
Almaniyada beş il yaşamış əcnəbi ailələrdə doğulan uşaqlar avtomatik olaraq Almaniya vətəndaşı olacaqlar.
Türklərin ikili vətəndaşlığının qarşısını almaq üçün əvvəllər qoyulan “Alman əsilli vətəndaş olmaq və 18 yaşına çatdıqda Almaniya və ya Türkiyə vətəndaşlığından birini seçmək” tələbi də ləğv edilir.
60 ildir ölkədə olan türklərin yarısı artıq Almaniya vətəndaşlığını alıb. Qalanlar dili kifayət qədər bildiklərini və yardımsız pul qazana bildiklərini sübut etsələr, Almaniya vətəndaşlığı üçün müraciət edə biləcəklər.
Bunun üçün onların Türkiyə vətəndaşlığından imtina etmələrinə ehtiyac qalmayacaq. Daha əvvəl Almaniya vətəndaşlığı almış şəxslər istəsələr Türkiyə vətəndaşlığını geri ala biləcəklər. Yeni qanuna avtomatik zərər müddəası daxil deyil.
Almaniya vətəndaşlığını qəbul edən şəxsin ailəsi də dolanışığı özü və ya ailədən kimsə ödədiyi halda vətəndaşlıq ala biləcək.
“Mavi Kart”la ölkəyə gələnlər qanuni müddəti başa vurduqdan sonra yaşayış icazəsi və daha sonra vətəndaşlıq ala biləcəklər.
Dolanışıq və dil tələbləri də onlara aiddir. Almaniyada sığınacaq istəyənlər sığınacaq qəbul edilərsə və qanuni müddətlərə və dil/yaşayış tələblərinə cavab verərsə, ikili vətəndaşlığa çevriləcəklər.
Alman olmaq üçün Türkiyə vətəndaşlığından çıxmaq tələbi qaldırıldığı üçün prosedurlar sürətləndiriləcək. Bu məqsədlə vətəndaşlıq idarələrinə əlavə kadrların cəlb edilməsi nəzərdə tutulur.
Vətəndaşlıq əldə etmək üçün Almaniya Konstitusiyasının azad, demokratik və fundamental nizamına riayət etmək vəd ediləcək. Həmçinin “antisemitizm, irqçilik və ya qeyri-insani hesab edilən digər hərəkətlərin” insan ləyaqəti ilə bir araya sığmadığını qəbul etmək tələbi var.
Qanun layihəsində əvvəllər yer almayan bir məqam da var. Müvafiq olaraq, prokurorluq ərizəçinin antisemitizm, irqçilik və ya digər qeyri-insani davranışlara görə cəzalandırılıb- cəzalandırılmamasını araşdıracaq.
Digər ağır cinayətlər onsuz da vətəndaşlığa əngəl törədir, lakin bu işlərə görə məhkum olunanlar cəzası yüngül olsa belə, Almaniya vətəndaşı ola bilməyəcəklər.
Sabah səsə qoyulacaq qanunun qüvvəyə minmə tarixi daha əvvəl 2024-cü il elan edilmişdi. Dəqiq tarix sabah dəqiqləşəcək.
Gununsesi.info
