BDU-da dünya şöhrətli türkoloq akademik Tofiq Hacıyevin 80 illik yubileyi qeyd olunub. Gununsesi.info-nun xəbərinə görə, Bakı Dövlət Universitetində Filologiya fakültəsinin təşkilatçılığı ilə dünya şöhrətli türkoloq, Əməkdar elm xadimi, “Şöhrət” ordenli, akademik Tofiq Hacıyevin anadan olmasının 80 illik yubileyinə həsr olunmuş “Azərbaycan filologiyası: İnkişafın yeni mərhələsi” mövzusunda Respublika Elmi Konfransı keçirilib.
Konfransı açıq elan edən rektor Abel Məhərrəmov akademik Tofiq Hacıyevin Bakı Dövlət Universitetindəki səmərəli elmi-pedaqoji fəaliyyətindən, Azərbaycan elminə və təhsilinə göstərdiyi əvəzsiz xidmətlərdən bəhs edib. Tofiq Hacıyevin 30 il BDU-nun Türkologiya kafedrasına rəhbərlik etməsindən, kafedranın Azərbaycanda türkoloji mərkəz hesab olunmasından, türkoloq-mütəxəssislərin yetişdirilməsindəki roluna diqqət çəkib. Sonra Filologiya fakültəsinin dekanı Elçin Məmmədov “Akademik Tofiq Hacıyevin həyat və fəaliyyəti” haqqında adlı məruzə ilə çıxış edib. Azərbaycan Respublikası Baş nazirinin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov akademik Tofiq Hacıyevin ömür yolundan, insani keyfiyyətlərindən milli təəssübkeşliyindən danışıb. Sonra Azərbaycan Yazıçılar Birliyinin sədri, xalq yazıçısı Anar, akademik Vasim Məmmədəliyev, Atatürk Mərkəzinin müdiri, professor Nizami Cəfərov, Nəsimi adına Dilçilik İnstitutunun direktoru Möhsün Nağısoylu, professor Qəzənfər Paşayev çıxış ediblər. Çıxışlarda akademik Tofiq Hacıyevin türkoloq, türkoloq-azərbaycanşünas olaraq fəaliyyətindən, yalnız Azərbaycanda deyil, ümumən, türk dünyası miqyasındakı xidmətlərindən, “Kitabi-Dədə Qorqud”dan bu tərəfə apardığı araşdırmalardan danışılıb. Bildirilib ki, Azərbaycanda ədəbi fikrin, ədəbi dilin tarixinin bu günə gəlib çıxması və Azərbaycan dilinin türk dilləri müstəvisindəki mövqeyinin elmi-nəzəri baxımından qiymətləndirilməsi Tofiq Hacıyev yaradıcılığının ağırlıq mərkəzində dayanırdı. Ailə üzvləri çıxış edən mərhumun oğlu Azər Hacıyev akademik Tofiq Hacıyevin 80 illik yubileyinə həsr olunmuş respublika elmi konfransının keçirilməsinə görə universitet rəhbərliyinə təşəkkürünü bildirib. Konfrans işini bölmələrdə davam etdirib. “Tofiq Hacıyev – görkəmli türkoloq”, “Dilçilik” və “Ədəbiyyatşünaslıq” adlı bölmələrdə ümumilikdə 117 məruzə dinlənilib.
Nigar Cəfərli
Gununsesi.info
