Almaniya Xarici İşlər Nazirliyi (XİN) Rusiya ilə bağlı səyahət tövsiyələrini sərtləşdirib və ölkə vətəndaşlarını dərhal Rusiya ərazisini tərk etməyə çağırıb.
Gununsesi.info xəbər verir ki, bu barədə qurumun yenilənmiş təhlükəsizlik xəbərdarlığında qeyd olunub.
Əvvəllər xəbərdarlıq əsasən Ukrayna ilə sərhəd bölgələrinə aid idisə, yeni tövsiyələr artıq Rusiyanın bütün ərazisini əhatə edir. Nazirlik Rusiya ərazisində pilotsuz uçuş aparatlarının (PUA) hücumları riskinin qalmaqda olduğunu bildirib.
Məlumatda qeyd olunur ki, Moskva, Sankt-Peterburq və Leninqrad vilayəti son aylarda dron hücumlarının daha tez-tez hədəfinə çevrilib.
“Moskva ətrafında hava hücumundan müdafiə sistemlərinin gücləndirilməsinə baxmayaraq, dron hücumları və onların qalıqlarının düşməsi bəzi hallarda ciddi ziyana səbəb olub”, – deyə açıqlamada vurğulanır.
Berlin ən təhlükəli bölgələr kimi Belqorod, Bryansk, Kursk, Voronej və Rostov vilayətlərini, eləcə də Krasnodar diyarını göstərib.
Nazirlik bildirir ki, davam edən müharibə fonunda təhlükəsizlik vəziyyəti sürətlə dəyişə və risklər qısa zamanda arta bilər. Həmçinin Rusiya daxilində aviasiya əlaqələrində fasilələr, hava limanlarının fəaliyyətində məhdudiyyətlər, reyslərin gecikməsi və ləğvi ehtimalı barədə xəbərdarlıq edilib. Bəzi regionlarda yanacaq təchizatında da fasilələr yarana bilər.
Sənəddə qeyd olunur ki, təhlükəsizlik riskləri təkcə hərbi təhlükələrlə məhdudlaşmır. Almaniya vətəndaşları, eləcə də ikili vətəndaşlığı olan şəxslər özbaşına saxlanılma riski və konsulluq dəstəyinin məhdudluğu barədə xəbərdar ediliblər. Rusiya ərazisində qalan şəxslərə kütləvi toplaşma yerlərindən uzaq durmaq, rəsmi təhlükəsizlik məlumatlarını izləmək və ELEFAND adlı böhran məlumatlandırma sistemində qeydiyyatdan keçmək tövsiyə olunur.
Eyni zamanda ABŞ Dövlət Departamentinin də ötən ilin sonunda Rusiya üzrə səyahət riskini ən yüksək – 4-cü səviyyədə qiymətləndirdiyi xatırladılıb. Vaşinqton öz vətəndaşlarına Rusiyaya səfərdən çəkinməyi, ölkədə olanların isə dərhal çıxmağı tövsiyə edib. ABŞ tərəfi əsas risklər kimi Rusiya–Ukrayna müharibəsinin davam etməsi, qanunvericiliyin sərt tətbiqi, saxlanılma riski və terror təhlükəsini göstərib.
