Yeni Azərbaycan Partiyasının (YAP) Nəsimi rayon təşkilatı da uzun illərdir ki, “Xocalıya ədalət!” kampaniyası çərçivəsində müxtəlif silsilə tədbirlər həyata keçirir.
Gununsesi.info xəbər verir ki, növbəti tədbirlərdən biri də Qanlı Xocalı facisənin şahidi və Xocalı cinayətinin qurbanlarından olan “Erməni Zindanında Səkkiz gün” əsərinin müəllifi Dürdanə Ağayevanın YAP Nəsimi rayon Gənclər Birliyi ilə keçirilən görüşü idi.
YAP Nəsimi rayon təşkilatının sədri, millət vəkili Məlahət İbrahimqizi Dürdanə Ağayevanı təqdim edərkən, onu cinayətkar erməni zülmünü səkkiz gün boyunca bütün varlığı ilə görən və yaşayan qəhrəman kimi təqdim edib.
Gənclərlə keçirilən bu görüşdə Dürdanə Ağayeva Heydər Əliyev Fondunun vitse-prezidenti Leyla xanım Əliyevanın bütövlükdə gördüyü işləri, xüsusilə də, onun rəhbərliyi ilə uzun illərdir ki, uğurla həyata keçirilən “Xocalıya ədalət!” kampaniyasını bütün Azərbaycan gəncliyinin uğuru kimi dəyərləndirib.
Görüş zamanı o, gənclərə erməni zülmünün acı və məşəqqətlərindən danışaraq, cinayətkar Ermənistan rəhbərliyini və onun işğalçılıq siyasətinin dünyada ifşa edilməsində, beynəlxalq qanunvericilik və hüquq çərçivəsində mühakimə edilməsində müasir gəncliyi səfərbər olmağa və bu dəhşətli faciəni dünya gənclərinə tanıtdırmaq yolunda səylərini əsirgəməməyə çağırıb.
Gununsesi.info
