Yeni icra başçılarından ikisi Eldar Əzizovun kadrıdır - FOTO

Ölkə başçısının bu gün imzaladığı sərəncamlarla Bakı şəhərinin Nərimanov və Nizami rayonlarına yeni icra başçıları təyin edilib.
Modern.az saytı xəbər verir ki, Elgin Şirin oğlu Həbibullayev Nərimanov, Coşqun Adil oğlu Cəbrayılov isə Nizami rayonunun rəhbərliyinə gətirilib.

Yeni icra başçılarının hər ikisi Bakı şəhərinin meri Eldar Əzizovun kadrı sayılır.

HTML tutorial


Belə ki, Elgin Həbibullayev Eldar Əzizov hələ Gəncə şəhər İcra Hakimiyyətinin başçısı işlədiyi dövrdə (2003-2011-ci illərdə) onun köməkçisi olub.

Eldar Əzizov 2011-ci ildə Sumqayıta icra başçısı təyin olunanda E.Həbibullayevi də özü ilə gətirib. Onu əvvəlcə yenidən köməkçi, sonra isə müavin vəzifəsində təyin edib.

2015-ci ilin noyabrında Sumqayıt şəhəri  İcra Hakimiyyətinin yeni başçısı Zakir Fərəcov İctimai-siyasi və humanitar məsələlər şöbəsinin müdiri, icra başçısının müavini Elgin Həbibullayevi tutduğu vəzifədən azad edib.
Amma E.Həbibullayev işsiz qalmayıb, əksinə daha böyük vəzifəyə irəli çəkilib. 2018-ci ilin oktyabrında Eldar Əzizov köhnə kadrını öz yanına gətirib – Elgin Həbibullayevi Bakı Şəhər İcra Hakimiyyətində Aparat müdiri təyin edib.


Coşqun Cəbrayılova
 gəldikdə, o, bugünkü təyinata – Nizami rayonu İcra Hakimiyyətinə başçı gələnə kimi Bakı Şəhər İcra Hakimiyyətinin Ərazi idarəetmə və yerli özünüidarəetmə orqanları ilə iş şöbəsinin müdiri vəzifəsində çalışıb.

Coşqun Cəbrayılov əvvəllər də Eldar Əzizovla işləyib. Belə ki, o, Eldar Əzizov Sumqayıt Şəhər İcra Hakimiyyətində və Səbail Rayon İcra Hakimiyyətində başçı işləyərkən onun Ərazi idarəetmə və yerli özünüidarəetmə orqanları ilə iş şöbəsinin müdiri vəzifəsini icra edib.

Daha sonra Bakı Şəhər İcra Hakimiyyətinin (BŞİH) başçısının (Eldar Əzizovun) köməkçisi vəzifəsində çalışıb. 2018-ci ilin sentyabrında Eldar Əzizov onu Bakı meriyasının Ərazi idarəetmə və yerli özünüidaretmə orqanları ilə iş şöbəsinin müdiri vəzifəsinə təyin etmişdi.
Qeyd edək ki, Eldar Əzizov 20 ildir icra başçısı vəzifəsində işləyir. Belə ki, o, 2000-ci lin iyun ayında Bakı şəhəri Nizami Rayon İcra Hakimiyyətinin başçısı vəzifəsinə təyin olunub.

2003-2011-ci illərdə Gəncə Şəhər İcra hakimiyyətinin başçısı vəzifəsində çalışıb.

2011-2015-ci illərdə Sumqayıt Şəhər İcra  Hakimiyyətinin başçısı olub.

2015-ci ilin sentyabr ayında isə Bakı şəhəri Səbail Rayon İcra Hakimiyyətinin başçısı vəzifəsinə təyin olunub.

Gununsesi.info