AB Standart Şirkətlər Qrupunun Dərnəgül Boru Zavodu QSC –də fəhlə işləmiş Sərməst Seyidəliyev Gununsesi.info-ya şikayət məktubu ilə müraciət edib. Vətəndaş saytımıza ünvanladığı məktubunda sabiq iqtisadi inkişaf naziri Heydər Babayev və onun yaxınlarını qanunsuzluqda, işçilərin əmək hüquqularını pozmaqda və mənimsəmədə ittiham edib.
Gununsesi.info Sərməst Sedəliyevin şikayətini təqdim edir:
İxtisasım jurnalist olsa da məcburi köçkünlükdən sonra ailəmi dolandırmaq üçün keçmiş iqtisadi inkişaf naziri Heydər Babayevin sahibkar olduğu AB Standart Şirkətlər Qrupunun Dərnəgül Boru Zavodu QSC –də fəhlə işləmişəm. On bir il həmin müəssisədə çalışmışam. Bu müddət ərzində nələrin şahidi olmamışam? Zavodun icraçı direktoru Məhəmməd Abbasov müəssisəni öz bildiyi kimi işlədir, vəzifəsindən sui istifadə edir, vəzifə səlahiyyətlərini aşır, saxtakarlığa yol verirdi. Qanuna əməl etmədən fəhlələri gecə-gündüz , qeyri iş günləri işlədirdi. Qeyri iş günlərinin və gecə pullarını vermirdi. Biz fəhlələrin qazancı hesabına hər ay ezamiyyət götürüb on-on beş günlərlə xarici ölkələrə gedirdi.
Ziyalı kimi onun haqsızlıqlarına dözməyib hüququmuzu tapdalayaraq bizi qul kimi işlətdiyini, qanuna əməl etmədiyini ona bildirdim. Sözlərimdən qəzəblənərək mənə cavabı bu oldu: biz belə işləyirik, xoşun gəlmir gedə bilərsən. Bir də hara şikayət edirsən et. İndi prokuror yox, məhkəmə yox, həmkarlar da həmçinin. Kimdir fəhlənin yazdığını oxuyan. Keçən ilin dekabr ayından direktorun əməllərini faktlarla respublika prokurorluğuna yazıram. Təsəvvür edin, prokurorluğa 25 dekabr 2015-ci il tarixdə yazdığım ərizəyə çox get-gəldən sonra 2016-ci avqustun 9-da cavab almışam. Cavabı imzalayan prokurorluqda istintaqa nəzarət idarəsinin rəis müavini baş ədliyə müşaviri cənab Qabil Qasımov məhkəməyə müraciət etməyimi bildirir.
Cavaba əsasən yenidən prokurorluğa müraciət edərək göstərdim ki, yaxşı, əmək haqqına görə məhkəməyə müraciət etdim. Bəs 9-10 bənddən ibarət göstərdiyim faktlar barədə hara müraciət etməliyəm? Bu dəfə prokurorluqda istintaqa nəzarət idarəsinin rəisi üçüncü dərəcəli dövlət ədliyyə müşaviri cənab Nazim Abbasovun imzası ilə cavab aldım. O da məhkəməyə müraciət etməyimi bildirir. M. Abbasovun özbaşınalıqları, haqsızlıqları, saxtakarlıqları və s. barədə Korrupsiyaya Qarşı Mübarizə Baş İdarısinə də ərizə ilə müraciət etmişəm. Aldığım nəlumata görə, həmin ərizə də baş prokurorluğa göndərilmişdir.
Başa düşə bilmirəm, işdə cinayət xarakteri olduğu halda nə üçün məhkəməyə müraciət etməliyəm? Verilən cavablarla razılaşmayıb oktyabrın 10-da baş prokurorluğa getdim. Çox çalışdıqdan sonra cənab Qabil Qasımov məni qəbul etdi. Qəbulda canlı söhbətimiz oldu. Ərizələrimdə göstərdiklərim faklardan əlavə də nöqsanları sadaladım. Yenə göstərdiyim faktların mümkünsə iştirakımla yoxlanılmasını bildirdim.
Çox söhbətdən sonra dedi ki, özəl müəssisələri yoxlamağa hüquqları yoxdur. Şikayətin bizlik deyil. Bizə nə qədər yazsan verdiyimiz cavabı yenə təkrar olaraq sizə göndərəcəyik. Axı nəyə görə? -deyə soruşdum. Dinmədi, sualım cavabsız qaldı.
Öz sualıma özüm cavab verib dedim ki, ərizəmi axıra kimi oxumamısınız. Elə başdan əmək haqqını oxuyan kimi “mülki işdir, məhkəməyə müraciət edin” cavabını göndərmisiniz. Məsələ burasındadır ki, tezbazar nəticəyə əl atmaq yox, onun məğzini, kökünü, səbəbini tapmaq lazımdır. Səbəb isə korrupsiya, özbaşınalıq, səhlənkarlıq, vəzifədən sui istifadə, vəzifə səlahiyyətlərini aşmaq, saxtakarlıqdır.
M.Abbasov fəhlələri qanunsuz olaraq qeyri iş günləri işlədib pulunu sahibkar Heydər Babayevlə mənimsəyiblər. Bizim pulumuz hesabına M. Abbasov hər ay zavoddan ezamiyyə götürüb xarici ölkələrə gedərək özünə şəxsi boru zavodu tikmək üçün avadanlıqlar alırdı. Hal hazırda zavod fəaliyyətdədir. Bacısının əri zavodda ambardar işləyirdi. Nə qədər pullanmışdısa şəhərdə dörd-beş yerdə, habelə dağlıq rayonların birində isti günlərdə ailəsi ilə birlikdə istirahət etmək üçün ev alıb. Şəxsən aylıq əmək haqqım onunkundan çox idi. Mən isə hələ də uşaq bağçasında yaşayıram. Göstərdiyim bu faktlar məhkəməlik yox sırf prokurorluqdur. Axı burada korrupsiya, cinayət var. Başa düşə bilmirəm, görəsən korrupsiyanın buynuzu olur?
Aydındır ki, incidilən vətəndaş qanun keşikçilərinə müracit etməlidir. Qanun keşiyinin başında dayananlar belə deyəndə adam lap dəhşətə gəlir. Prokurorluqdan çıxanda M. Abbasovun dediyi sözləri indi başa düçdüm və bir daha təkrarladım: hara şikayət edirsən et. İndi prokuror yox, məhkəmə yox, həmkarlar da həmçinin. Kimdir fəhlənin yazdığını oxuyan.
Qəribə dövrdə yaşayırıq, deyilmi?
